Rhydychen, Llsgr. Coleg yr Iesu 57 – tudalen 250
Llyfr Blegywryd
250
ac na bo etiued idaỽ yr|arglỽyd a|deily y da o
gỽbyl. ac a|dyly bot yn|ỻe mab idaỽ. a marỽty
vyd y ty. ac o|r oet hỽnnỽ aỻan y byd un vre+
int a|bonhedic canhỽynaỽl. kanyt|oes vreint
idaỽ namyn y vonhed. ac nat aa ynteu ym
breint y dat yny vo marỽ y dat. ac na byd
marchaỽc neb yny ysgynno. Merch gỽedy
bedydyer yny seith·mlỽyd. ny dyly vynet
yn ỻỽ. O|r pan aner yny vo deudengmlỽyd
ny dyly vynet y ỽrth noe y that. o|hynny
aỻan y|daỽ bronneu a chedor arnei. ac y blo+
deuha. ac yna y byd oet idi y rodi y ỽr. ac o
hynny aỻan kyny chaffo y rodi y ỽr. hi a
dyly uedu ar yr|eidi. ac ny byd ỽrth noe y
that wedy hynny. onyt e|hun a|e mynn. ac
ny dyly y that talu amobyr dros y verch. o+
nyt e|hun a vyd rodyat arnei. Os ef a|vyd
rodyat arnei. kymeret veicheu y gan y neb
a|e kymero. O|e deudeng|mlỽyd hyt y phede+
ir blỽyd ar dec y dyly vot heb veichogi. ac o+
dyna hyt y deugein|mlỽyd y|dyly ymdỽyn.
| « p 249 | p 251 » |