LlGC Llsgr. Llanstephan 27 (Llyfr Coch Talgarth) – tudalen 10r
Ystoria Lucidar
10r
ffynnaỽn y drugared a|lithraỽd o|r wyry veir. Tangnefed
a|vu yn|y byt pan doeth gỽir dangnefed y|r daear. Ysgriven+
nu y byt a|wnaethpỽyt. ar·dangos eu bot yn|darestynge+
dic y|r gỽir vraỽdyr. Y rei a|las a|dengys yd aant yng|kyfyr+
goỻ. Y niuer a ymwrthotto a|duỽ ac a|e orchymynneu.
Yr aniueilyeit mut a|dywaỽt. o achaỽs ymchoelut pobyl
y sarassinyeit y voli duỽ discipulus Paham y doeth y tri brenhin
a|r teir anrec y adoli crist. Magister Y dangos mynnu ohonaỽ ef
tynnu attaỽ teir rann y byt a|r daear. nyt amgen yr asia
affrica ac europpa. discipulus Paham y ffoes ef y|r eifft mỽy noc y
wlat araỻ. Magister Y dangos bot yn wir y voesen dỽyn ohonaỽ
plant adaf o geithiwet kythreul. megys y|duc moesen bo+
byl yr israel o geithiwet pharao vrenhin yr eifft. ac odyna
ym·penn y seith mlyned yd ymchoelaỽd drachevyn y gaer+
ussalem nefaỽl drỽy seith donyeu yr yspryt glan. discipulus Paham
na mynnaỽd ef na dysgu na gỽneuthur gỽyrtheu yny
vu deng mlỽyd ar|hugeint. Magister Y rodi angkreifft y baỽp yn
y byt hỽnn na|dysgei yny delei y|r oetran deduaỽl. discipulus Paham
y kymerth ef vedyd ac ynteu yn gyflaỽn o bop dwyỽolder.
Magister Yr kyssegru y dỽfyr ynni. discipulus Paham y bedydywyt ef yn|y
dỽfyr. Magister am vot y dỽfyr yn wrthwyneb y|r tan. a megys y
diffyd y dỽfyr y tan. veỻy y diffyd y pechaỽt yn|y bedyd. a
pheth araỻ yỽ. y dỽfyr a wylch pob|peth budyr. ac ef a|diffyd
sychet. ac a|welir gỽasgaỽt yndaỽ. veỻy y gỽylch rat yr
yspryt glan vudred y pechodeu drỽy y bedyd. a|dileu sychet
yr eneit a|wna o eir duỽ a gỽasgaỽt duỽ a|e delỽ a|welir pan
ymadawer a|r pechodeu. discipulus A|oed dec iessu herwyd anyan. Magister
| « p 9v | p 10v » |