LlGC Llsgr. Llanstephan 27 (Llyfr Coch Talgarth) – tudalen 71v
Buchedd Dewi, Buchedd Beuno
71v
y eiryaol y ninneu geyr bronn y gỽir greaỽdyr ar gaffel tru+
gared rac ỻaỽ. a M E N
Dywededic vu hyt hynn o vuched dewi sant. Dyweda+
dỽy yỽ rac ỻaỽ o vuched beuno sant.
G *wr bonhedic a|oed gynt ym powys yn|y ỻe a|elwir
banheingk. geyr·ỻaỽ auon a|elwit yn|yr amser.
hỽnnỽ sabrina. Hafren yỽ honno yr aỽr·honn. ac enỽ y gỽr
bonhedic hỽnnỽ oed bugi. a|e wreic a|elwit beren uerch law+
den. dynyon gỽirion oedynt a|da oed eu buched. a|gorchym+
mynneu duỽ a|wneynt o bop fford o|r y geỻynt heb enwired
o|r byt a|eỻit y dodi yn eu herbyn. ac nyt oed udunt etiued o
vab. a|dynyon oedaỽc oedynt ual na bydei blant udunt vyth
kanys y rann vỽyaf oc eu hamser a|dreulassynt. a|chyt·gys+
gu yr|oedynt yr ys deudeng mlyned heb achaỽs knaỽtaỽl y+
ryngthunt. a hynny o|e duundeb yỻ deu. a dyd·gỽeith ual
yr oedynt yn ymdidan. ỽynt a welynt angel yn dyuot at+
tunt. a|e wisc yn gyn wynnet a|r eiry. ac yn|dywedut ỽrth+
unt bydỽch laỽen a hyfryt. kanys gỽarandewis duỽ aỽch
gỽedi. Ac yna y|dywaỽt yr angel ỽrth y gỽr. Bit heno heb ef
gedymdeithyas knaỽdaỽl y·rot ti a|th wreic. a|hi a|geiff bei+
chogi. ac o|r beichogi hỽnnỽ ef a|enir mab idi. a|hỽnnỽ a|vyd
anrydedus herwyd duỽ a|dyn. ac ual y gorchymynnaỽd yr
angel udunt ỽynt a|e gỽnaethant. a|beichogi a gafas beren
y nos honno. ac o|r beichogi hỽnnỽ ef a anet mab idi. ac
ar y mab hỽnnỽ yn enỽ y dodet beuno. a meithryn y mab
a|wnaethant yny vu amser y rodi ỽrth leen. Ac yna yd an+
uonet ef hyt att sant a|oed yng|kaer went. enỽ y sant tan+
gusius.
The text Buchedd Beuno starts on line 5.
| « p 71r | p 72r » |