LlGC Llsgr. 3035 (Mostyn 116) – tudalen 155r

gudysyt yn yr ynys. dalym o vlynedoed y|gan henri vrenhin y|wlat

dyuet a|r genedyl hono a achubaỽd hoỻ gantref ros. gyr ỻaỽ

aber yr auon a|elwir cledyf. Gỽedy gỽrthlad o gỽbyl a|r genedyl

hono megys y|dywedir a|hanoed o|flandrẏs y|gỽlat yr hon ẏssẏd

ossodedic y|nessaf gyr ỻaỽ mor y|brytanyeit. O achaỽs achub

o|r mor a gỽeresgyn y gỽlat. hyt y n* |ychmoelỽyt* yr hoỻ wlat ar

grynnodeb heb dỽyn dim frỽyth wedi bỽrỽ o|lanỽ yr mor dielỽ

wimon a|r tywot y|r tir. Ac yn|y diwed wedy na cheynt le y pres+

sỽylaỽ. canys y|mor a dineuassei ar draỽs yr aruordired a|r my+

nyded yn gyflaỽn o dynyon hyt na aỻei baỽb gyt·bressỽylaỽ y*

yno o achaỽs amylder y|dynyon a|bychanet y|tir y genedyl hono

a|deissyfaỽd|henri vrenhin ac a·dolygaỽd idaỽ gaffel ỻe y|pressỽylynt

yndaỽ. ac yd anuonet hyt yn ros drỽy ỽrthlad odyno y priodol+

yon giỽdaỽtwyr y|rei a goỻyssant eu priaỽt wlat a|e ỻe. yr hyny

hyt hediỽ. Yg|kyfrỽg hyny gerald ystiward penuro a|rỽndwalaỽd

casteỻ kenarch bychan ac ansodi a|wnaeth yno a|ỻehau yno y|hoỻ

oludoed a|e|wreic a|e etifedyon a|e hoỻ annỽylyt a|e gadarnhau

a|wnaeth o glaỽd a mur. Y|vlỽydyn racỽyneb y|paratoes kadỽgaỽn

ap|bledyn wled y|penaduryeit y|wlat ac y|gỽahodes y|r wled a wna+

thoed ywein y vab o|powys a|r wled hono a|wnaeth ef y nadolyc yr

anryded y|duỽ. A gỽedy daruot y|wled a|chlybot o|ywein vot nest

verch rys ap teỽdỽr gỽreic gerald ystiwart yn|y dywededic gasteỻ

vry mynet a oruc y ymwelet a|hi ac ychydic o nifer ygyt ac ef.

Megys achares ac veỻy yd|oedynt. Canys kadỽgaỽn vab bledyn

a gỽladus verch riỽwaỻaỽn mam nest a|oedynt gefyn·derỽ a chef+

nitherỽ. kanys bledyn a|riwaỻaỽn veibon kynyn a|oedynt vrodyr

y|agharat verch varedud vrenhin. a gỽedy hyny o|anoc duỽ y

doeth eff nosweith y|r casteỻ ac ychydic o nifer gyt ac ef val am+