LlGC Llsgr. 3035 (Mostyn 116) – tudalen 31v
Brut y Brenhinoedd
31v
a|chyrchu y diffeithuor. A|dec niwarnaỽt ar|hugein y
buant yn kerdet hyt yr affric. Ac odyno y doethant
hyt ar aỻoryeu y|philystewydẏon a hyt yn ỻyn yr
helyc Ac odyna yd|aethant hyt yrỽg ruscan a|my+
nyd azaras. Ac yna y|bu ymlad maỽr arnunt ẏ gan
genedyl y|piratas. A gỽedy goruot onadunt hỽy
kymryt ỻawer o yspeileu y|piratas a|wnaethant.
Ac odyna y kerdassant dros auon malyf yny doeth+
ant hyt y|mor|y|tan Ac y|bu reit vdunt yna o dlodi
bỽyt a diaỽt mynet y|r tir oc eu ỻogeu. Ac anreith+
aỽ y|wlat a|wnaethant hyt yg|colofneu hercỽlf. Ac
yd ymdangosses y voruorỽyn vdunt a damgylchy+
nu eu llogeu ac y|bu a·gos ac eu bodi o|gỽbyl. Ac
odyna y doethant hyt y|mor teryn. a|chyr ỻaỽ y|mor
hỽnỽ y kaỽssant pedeir kenedyl o aỻtudyon tro o|r rei
a ffoassei ygyt ac antenor o dro. Ac yn dywyssaỽc ar+
nadunt corineus gỽr hynaỽs oed hỽnnỽ goreu y gyg+
or o|r gỽyr mỽyaf y|nerth a|e leỽder a|e gedernit.
Pei ymdrechei a|chaỽr ef a|e bỽryei mal y|mab ỻeiaf
A gỽedy ymadnabot gỽrhau a wnaeth corineus y vru+
tus a|r bobyl a oed y·gyt ac ef. A hỽnỽ ym|pob ỻe o|r y
bei reit ỽrth ỽr a ganhorthỽyei vrutus. Ac odyna y
doethant hyt ym|porth lygerys yg|gỽasgỽin a bỽrỽ
agoreu yno. Ac yna y gorffoỽyssassant yn edrych an+
saỽd y|wlat seith nieu. a seith nos
A c yn yr amser hỽnnỽ yd oed goffar fychty yn
vrenhin yg gỽasgỽin a|pheitaỽ. A gỽedy clybot o
hỽnỽ diskynu estraỽn genedyl yn|y wlat anuon
a wnaeth attunt y ỽybot beth a vynynt ae ryuel
ae hedỽch. Ac val yd oed genadeu goffar yn dyuot
| « p 31r | p 32r » |