LlGC Llsgr. 3035 (Mostyn 116) – tudalen 58v
Brut y Brenhinoedd
58v
y ar yr ynys honn. A gỽedy clybot hyny yn rufein. Sef a|wna+
ethant anuon seuerus senedỽr a dỽy leg o|wyr aruaỽc
gantaỽ y gymeỻ ynys prydein ỽrth eu harglỽydiaeth
val kynt. A gỽedy dyuot seuerus hyt yr ynys honno
a bot ỻa·o·wer o ymladeu creulaỽn yrygtaỽ a|r brytan+
yeit gỽeresgyn ran o|r ynys a|wnaeth. A ran araỻ ny
aỻỽys y gỽeresgyn. Namyn o vynych ymladeu eu
gofalu heb peidaỽ ac ỽynt yny deholes dros deifyr
a|byrneich hyt yr alban. A|sulyen yn tywysaỽc arnadunt
Sef a|wnaeth y|deholedigẏon hynnẏ kynuỻaỽ mỽyaf
a aỻassant o|r ynyssed yn eu kylch a gofalu eu gelynẏ+
on drỽy vynych ryfel a brỽydreu. A thrỽm vu gan se+
uerus diodef eu ryfel yn wastat. Sef a wnaeth erchi
drychafel yrỽg yr alban a deifyr a byrneich o|r mor
pỽy gilyd ac eu gỽarchae mal na chefynt dyuot dros
teruyn y|mur hỽnnỽ. Ac yna y gossodet treul kyffredin
ỽrth a·deilat y|mur hỽnnỽ o|r mor y|gilyd. A|r mur hỽnnỽ
a|parhaỽys drỽy lawer o|amser. Ac a|e hetelis yn vynych y
y ỽrth y|brytanyeit. A|gỽedy na aỻỽys sulyen kynal ryfel
a vei hỽẏ yn erbẏn yr amheraỽdyr. Mynet a oruc hyt yn
sithia y geissaỽ porth y|gan y|fichteit y|weresgyn y|kyfoeth
drachefẏn. A gỽedy kynuỻaỽ o·honaỽ hoỻ jeuenctit a|deỽ+
red y|wlat honno dyuot a|wnaeth y ynys prydein a ỻyges
vaỽr gantaỽ A gỽedy eu dyuot y|r tir kyrchu am ben
kaer efraỽc a oruc a dechreu ymlad a|r gaer. A gỽedy
kerdet y|chwedẏl yn honeit dros y|teyrnas yd ymedewis
y|ran vỽyaf o|r brytanyeit y|rei a oed gyt a|r hamheraỽdẏr
ac yd aethant at sulyen. Ac yr hynnẏ eissoes ny pheidas+
sant yr amheraỽdẏr a|e lu a|e darpar. Namẏn kynuỻaỽ
gỽyr rufein ac a drigyassei o|r brytanyeit y·gyt ac eff.
| « p 58r | p 59r » |