LlGC Llsgr. Peniarth 11 – tudalen 155r

ef a|disgynnaỽd ac a gyffessaỽd ỽrth y meudỽy. Ac a vỽryaỽd y ỽrthaỽ

y hoỻ bechodeu drỽy ediuarỽch a|chyffes. arglỽyd heb y|meudỽy mo+

gel rac ebry·vygu o·honat y govyn. a|ebryfygaỽd y ỻaỻ o|th vlaen.

ac na symlet arnat dim oc a|welych ar drỽs y casteỻ. namyn mar+

chocka ragot a gỽedia y|r capel santeid yssyd yno. Arglỽyd heb·y

gỽalchmei mi a|archaf y duỽ kennattau ym aỻel gỽneuthur

bod duỽ a|r seint. a chymryt kennat y meudỽy a oruc ef a my+

net ymeith. a|marchogaeth yny doeth y dyffryn tec. a|phob da yn+

daỽ yn amyl. ac odyna ef a arganuu y racwerthuaỽr gapel. ac

yna disgynnu a|oruc ef a gostỽng ar|dal y deulin a gỽediaỽ duỽ.

A gỽedy hynny esgynnv ar y varch a|marchogaeth yny doeth

y ymyl ysgrin dec ar y fford. ac ar|warthaf yr ysgrin yr oed ky+

vyrlit tec. ac yn|y chylch o·gylch yd oed mynwent vechan dec. Ac ar

hynny ef a|glywei lef yn|dywedut ac yn erchi idaỽ nat elei yng+

hyfyl yr ysgrin. kanys nyt tydi y milwr y gỽybydir beth ysyd

yndi o|e achaỽs. Gỽalchmei a|gerdaỽd racdaỽ pan|gigleu y ỻef. ac

a|uarchockaaỽd yny doeth. gyferbyn a|phorth y casteỻ. ac a argan+

vu deir|pont maỽr aỽr* aruthur o|e kerdet. a their avon y·danunt

yn redec. ac ef a|welei bot yn|hyt y bont gyntaf ergyt saeth. ac nat

oed yn|y ỻet hitheu namyn troetued. Ac ny wydyat gỽalchmei beth

a|wnaey o|dybyeit na aỻei neb y cherdet nac ar droet nac ar varch.

M Egys y bydei ef ueỻy ef a|welei varchaỽc urdaỽl prud

yn dyuot hyt ar benn y bont. yr honn a|elwit pont y

ỻassywen. ac yn galỽ arnaỽ ac yn erchi idaỽ dyuot yn|vuan ar|hyt

y bont. kanys agos yỽ y|r nos. a|chymeint ac yssyd yn|y casteỻ

y|maent y|th aros di. Arglỽyd heb·y gỽalchmei manac ditheu