LlGC Llsgr. Peniarth 11 – tudalen 22v
Ystoriau Saint Greal
22v
paỽb o|r|wlat goruot ar y seith marchaỽc llawen uuant
a|gostỽng y alaath megys pei efo a|uei arglwyd arnadunt.
Ac yna galaath a|beris y baỽp dyuot geyr bronn merch y
duc a|gỽneuthur gỽrogaeth idi. A|thynghu vyth yn eu hoes
na|diodefynt y drycaruer hỽnnỽ arnadunt. Ac yna gala+
ath a|erchis y|r morynyon a|oedynt yno vynet o|e gwlato+
ed eu|hunein yn|iach. Y nos honno y bu galaath yno. a
thrannoeth y bore ef a|doeth chwedyl y|r kasteỻ. kyfaruot o
walchmei. a|gaharyet. ac owein uab uryen a|r seith mroder
a|cheissyaỽ o|r seithwyr ỻad gỽalchmei a|e gedymdeithyon. Ac
eissyoes arnadunt ỽy y digỽydyaỽd y ỻadua. kanys gỽalch+
mei a|e gedymdeithyon a|e ỻadaỽd ỽyntỽy. A|phan gigleu ga+
laath hynny ryued vu ganthaỽ a|gỽisgaỽ y arueu a|oruc. a
chychwyn o|r casteỻ drỽy adaỽ paỽp yno ar y|lewenyd ac ar y
hedỽch. ac ỽynteu a|e|kanhebryngassant ef. yny beris ef
udunt ỽy ymchoelut. ac ynteu a varchokaaỽd. ac eissyoes.
Yma y|mae y kyfarỽydyt yn|tewi am galaath. ac yn trossi
Y R ymdidan yssyd yn dywedut gỽ +[ ar walchmei ~
edy ymwahanu gỽalchmei y wrth y gedymdeithyon
uarchogaeth ohonaỽ heb gyfaruot chweith antur
ac ef a vei wiỽ y venegi. yny doeth hyt y vanachlaỽc o|r|ỻe
y kymerth galaath y daryan. Ac yno y managỽyt idaỽ
pa vod y kaỽssoed galaath y daryan. Ac yna gỽalchmei a
vynnaỽd* udunt pa|fford yd athoed galaath. a gỽedy y ve+
negi idaỽ. ynteu a|gyrchaỽd y fford honno. ac a uarchokaa+
ỽd hyt y ỻe yd oed melian yn|glaf. ac yno y|nos honno y|bu
ef
| « p 22r | p 23r » |