LlGC Llsgr. Peniarth 31 – tudalen 13r
Llyfr Blegywryd
13r
wheu·geint a phunt. Y heguedi; teir punt. Y
Ebediỽ bard teulu. punt. Ran gỽr a geiff mal
pop teuluỽr. A chanys pen kerd a dechreu kerd;
yn nessaf yr pen teulu y dyly eisted.
O|r pan el y brenhin yr neuad hyt pan el pa+
ỽb yỽ lety. ny dyly y dryssaỽr mynet y ỽrth y
drỽs mỽy no hyt y vreich a|e wyalen. Ac o chef+
fir yn pellach no hynny; a|e sarhau yno. ny
diwygir ida . Llestyr a uyd idaỽ yn|y neuad
y dodi y diaỽt yndaỽ. Distein ar guallofyeit
oll gyt ac ef yn|y teir gỽyl arbenhic a ofỽyant
y dryssaỽr y dodi guiraỽt yn|y lestyr o|r kyrn
ar meileu. Ef a geiff corneit y gan y brenhin.
Ac arall y gan y vrenhines. Ar trydyd y gan
y pen guastraỽt o wiraỽt yr ebystyl pan rod+
her. Crỽyn y guarthec a ladher yn|y gegin ef
a|e keidỽ hyt pan ranher. A cheinaỽc a geiff
ynteu o pop croyn. O|r llud y porthaỽr neu y
dryssaỽr neuad vn o|r sỽydocyon y ỽrth y porth
neu y ỽrth y drỽs gan y atnabot camlỽrỽ deu+
dyblyc a tal yr brenhin. A phedeir keinhaỽc
kyfreith yr sỽydaỽc. Ac os vn o|r sỽydocyon ar+
benhic uyd hỽnnỽ; talet yn deudyblyc idaỽ.
Y tir a geiff yn ryd. A ran a geiff o aryant y
| « p 12v | p 13v » |