LlGC Llsgr. Peniarth 31 – tudalen 2v
Llyfr Blegywryd
2v
A thri ban arnei A|thri y danei kyfrasset ar wi+
alen. A ffiaỽl eur a anho. llaỽn diaỽt y brenhin
yndi. A chlaỽr eur arnei kyflet ac ỽyneb y bren+
hin. kyn|tewet uyd y ffiaỽl ar claỽr ac ewin a+
maeth a amaytho seith mlyned neu plisgyn
ỽy gỽyd. yn|y mod hỽnnỽ y telir sarhaet bren+
hin a uo eistedua arbenhic idaỽ megys dinef+
ỽr dan vrenhin deheuparth. neu aberffraỽ. neu
vrenhin gỽyned. Ony byd eistedua arbenhic
idaỽ; ny cheiff onyt gwarthec. Breint arglỽyd
dinefỽr yỽ kaffel dros y sarhaet gwarthec gỽyn+
yon clust·gochyon kymeint ac a anhont ol
yn ol rỽng argoyl a llys dinefỽr. a tharỽ vn+
lliỽ ac hỽynt gyt a ffob vgein o·honunt. Ny
thelir eur namyn y vrenhin dinefỽr neu y vren+
hin aberffraỽ. O tri mod y serheir y vrenhines;
pan torrer y naỽd. neu pan trawer trỽy lit. neu
pan tynher peth gan treis o|e llaỽ. Trayan gwe+
rth sarhaet brenhin a telir yr vrenhines dros
y sarhaet heb eur a heb aryant. Brenhin a dy+
ly vn gỽr ar|pymthec ar|hugeint o wyr arueith
yn|y getymdeithas. nyt amgen y petwar|ssỽyd+
aỽc ar|hugeint. ar deudec gwestei. a|e teulu. a|e
ỽchelwyr. a|e vaccỽyeit. a|e gerdoryon. a|e reudus+
son.
| « p 2r | p 3r » |