LlGC Llsgr. Peniarth 35 – tudalen 26r
Llyfr Iorwerth
26r
TEir ouer uechni yssyd. Un yỽ
onadunt Pan prynho dyn peth
y gan arall yr aryant. A chymryt
mach ar y peth; Ac na chymerer mach ar yr
aryant a bot ediuar gan perchen yr aryant
y kyfnewit Cany myn ef mỽynhau y mach
yssyd idaỽ ar y peth y kymyrth. Ac nat oes
uach yr llall ar yr aryant ac a gymhello i+
aỽn idaỽ o|e kyfneit. vrth hynny y mae ouer
y mach o|r neill tu Cany myn y perchennaỽc
ef. Eil yỽ O deruyd y dyn rodi mach y ar+
all ar peth anilis yn rith dilis a dyuot per+
chennaỽc y da o|e amlyssu. iaỽn yỽ caffel o
perchennaỽc y da yr eidaỽ ket rodher mach
arnaỽ Cany dylyit y rodi. Ac ny dylyir y
kychwyn o|r llaỽ y mae yndi yny del arỽystyl
kystal ac ef y gan yr arwassaf. O deruyd
yr arwassaf dywedut na dyly talu namyn
kymeint ac a cauas yr y peth pa ryỽ beth
bynhac uo. y kyfreith. a| dyweit dylyu o·honaỽ ef
gwerth kyfreith; y peth pa ryỽ beth bynhac uo. ~ ~
Ac ỽrth na eill y mach kynhal y uechniaeth
yd aeth yn uach arnei y gelwir yn ouer uach.
Tryded yỽ nyt mach mach gỽreic. Sef yỽ
hynny ny dyly gỽreic uot yn uach Cany dy+
ly gỽraged gwadu mach. Ac na dyly hitheu
reithwyr o|e gwadu hi. y kyfreith. hagen a| dyweit
| « p 25v | p 26v » |