LlB Llsgr. Ychwanegol 19,709 – tudalen 32v
Brut y Brenhinoedd
32v
ac y gỽnaeth molest a|chreulonder ar ẏ brẏtanyeit
o achaỽs ry ymadaỽ o·nadunt ac ar·glỽydiaeth
gỽyr rufein a gỽrhau y garaỽn. Sef a|wnaeth
y brytayeit* heb aỻu diodef hynny duunaỽ y+
gẏt a|gỽneuthur asclepiodocus tywysaỽc kerny+
ỽ yn vrenhin arnadunt. ac odyna kynuỻaỽ ỻu
ac ymlad a gvyr rufein. a|phan yttoed aỻectus
yn ỻundein yn gvneuthur gỽyluaeu y|ỽ tatol+
yon dỽyweu. pan gigleu ef bot y brytanyeit.
yn dyuot am y|pen. peidaỽ a wnaeth a|r a·bertheu
yd oed yn eu gvneuthur a|mynet o·dieithyr y|di ̷+
nas a|e gedernit gantaỽ. a gvedy bot ymlad y·rydunt
aerua diruaỽr y meint a las o|pop parth. ac eissoes
asclepidiotus a oru˄u a|r brytanyeit. a gvasgaru by+
dinoed gỽyr rufein ac eu kymeỻ ar ffo. ac yn yr er+
lit hỽnỽ ỻad aỻectus a|ỻawer o vilyoed onadunt. a
phan welas lelius gaỻus ketymdeith aỻectus ry
gaffel o|r brytanyeit y vudugolyaeth. sef a|wnaeth
ynteu kynuỻaỽ yr hyn a diaghyssei o|e getymdeith+
on a|chyrchu kaer lundein. a|chayu y pyrth a|chynal
y dinas arnadunt o tebygu gaỻu gochel eu hageu
veỻy. ac eissoes sef a|wnaeth asclepidiotus eu gỽarchae
yno ỽynt. ac anuon ar pop tywyssaỽc yn ynys. prydein.
y venegi yr daruot idaỽ ef ry lad aỻectus a ỻawer
o vilyoed y·gyt ac ef. a|e vot ynteu yn gỽarchae yr
hyn a dihaghassei onadunt yg|kaer lundein. ac ỽrth
hẏnnẏ erchi y baỽb yn gytduun dyuot a|e hoỻ borth
gantaỽ y geissaỽ diwreidaỽ gỽyr rufein yn ỻỽyr
| « p 32r | p 33r » |