LlB Llsgr. Cotton Cleopatra A XIV – tudalen 62v
Llyfr Cyfnerth
62v
Or ymladant guyr escob neu wyr abat
A guyr brenhin ar tir teyrn eu dirỽy
a| daỽ yr teyrn. A chyt ymladont guyr es ̷+
cob a guyr abat ar tir teyrn. yr teyrn y
daỽ eu dirỽy. Y neb a artho tir dros lud
arglỽyd. talet pedeir keinhaỽc kyfreith
o agori dayar gan treis a phedeir kein+
haỽc. kyfreith o diot yr heyrn or dayar a
cheinhaỽc o pop kỽys a ymhoeles yr ar+
adyr. kymeret y brenhin yr ychen oll
ar aradyr ar heyrn a guerth y troet de+
heu yr amaeth. A guerth y llaỽ deheu yr
geilwat. Or clad dyn tir dyn arall yr
cudyaỽ peth yndaỽ. pedeir keinhaỽc ky+
ureith a| geiff perchenaỽc y tir am agori
dayar ar gudua onyt eurgraỽn uyd ca ̷+
nys brenhin bieu pop eurgraỽn. Y neb
a| wnel annel ar tir dyn arall ac ae cuth ̷+
yo yndaỽ. talet pedeir keinhaỽc kyfre ̷+
ith o agori dayar y perchenaỽc y tir ac or
keffir llỽdyn yndaỽ perchenaỽc y tir bi+
eiuyd
| « p 62r | p 63r » |