Rhydychen, Llsgr. Coleg yr Iesu 57 – tudalen 58
Llyfr Blegywryd
58
am y varn a rodassei ef udunt ỽy kynno hynny.
Pymhet yỽ. mach am y uechni kyfadef y+
rỽng deudyn. pan watto rann o|e uechni ac
adef rann araỻ. Chwechet yỽ. offeiryat rỽng
y deudyn blỽyf. am yr hynn a|dystassat* idaỽ
kynno hynny. Seithuet yỽ. Morỽyn am
y|gỽyrdaỽt. os y gỽr y rodet idaỽ a|e hameu
yr gỽaethau y breint. credadỽy yỽ hi o vyỽn
y|deudeng|mlỽyd. Os gỽedy y deudeng|mlỽyd y
ỻỽ ar y|phymhet o|r dynyon nessaf idi a|dyry.
O|r treissir morỽyn hagen. a dywedut o|r tre+
isỽr nat oed uorỽyn hi. tystolyaeth y vorỽyn
e|hun a|gredir yn|y erbyn am y morỽyndaỽt.
Wythuet yỽ. bugeil trefgord am lỽdyn a|lado
ysgrybyl y dref yn|y wyd ac yn|y warchadỽ.
Naỽuet yỽ ỻeidyr ỽrth y|groc. pan vo diheu
ganthaỽ y grogi. credadỽy uyd heb greir ar
y gytleidyr. ac am yr|hynn a|duc ynteu yn ỻedr+
at. Y gytleidyr hagen ny byd crogadỽy yr gei+
reu y ỻaỻ. namyn ỻeidyr vyd. ỻeidyr am ledrat
| « p 57 | p 59 » |