LlGC Llsgr. Llanstephan 4 – tudalen 35r
Buchedd Beuno
35r
yr aỽrhonn a mỽy vyd dyd braỽt. pan
dywetto yr arglỽyd ỽrth y seint. Meiby+
on bendigedic vyn|tat i. deuwch chỽi y
uedu y deyrnas a barattoet yỽch yr de+
chreu byt. y ỻe y byd buched heb agheu.
a Jeueingtit heb heneint. a y˄echyt heb
dolur. a ỻewenyd heb dristyt. Y seint yn
y|rad uchaf y·gyt a|duỽ dat yn unoly+
aeth a|r egylyon. a|r archegylyon yn vn+
olyaeth a|disgyblon iessu grist. vn vnol+
yaeth naỽrad nef. Y|rei ny phechassant
yn vnolyaeth y tat a|r mab a|r yspryt
glan. ameN. Archỽn ninneu truga+
red duỽ hoỻgyuoethaỽc drỽy ganhor+
thỽy beuno sant. val y gaỻom nin+
neu gaffel y·gyt ac efo buched dragy+
wyd yn|yr oes oessoed A M E N.
Beuno uab bugi uab [ ach beuno.
gwynỻiỽ. vab tegit. vab kadeỻ dryn+
ỻuc. Mab kategyrn. vab gortheyrn.
vab Rittegyrn. vab deheuwynt. vab
eudegan. vab eudegern. vab elud.
vab eudos. vab eudoleu. vab avaỻach.
vab amalech. vab belim. vab anna.
Mam yr|anna honno oed gefnithderỽ
y veir wyry mam grist. ~ ~ ~ ~ ~
| « p 34v | p 35v » |