LlGC Llsgr. Peniarth 11 – tudalen 163r
Ystoriau Saint Greal
163r
kỽbỽl o|e hoỻ genedyl yssyd wedy|r blygu drỽy y angheu ef.
a minneu a|warantaf heb·y laỽnslot. na bydy di vyth myỽn peri+
gyl o eisseu cael ne* vy nerth i. ~ ~ ~
L aỽnslot a gysgaỽd y nos honno yng|kasteỻ glado+
nius gỽedy daruot idaỽ peri y|r marchaỽc kỽbỽl o|e
dir a|e|daear ỽrth y ewyỻys. A|phaỽp yn|gỽrhau idaỽ. A
phan wybu baỽp o|r wlat varỽ gladonius ef a|vu drỽc gan+
thunt. Laỽnslot drannoeth a|aeth ymeith. a|r|marchaỽc
a|drigyaỽd yno. a|marchogaeth a|oruc laỽnslot yn hyt y dyd ~
drỽy y fforest. yny gyfaruu ac ef marchaỽc urdaỽl yn mar+
chogaeth a|e o·gỽyd ar goryf y gyfrwy a|chỽynuan uaỽr y ̷
ganthaỽ. rac meint y dolur. Arglỽyd heb ef ỽrth laỽnslot.
yr|duỽ ymchoel drachevyn. kanys y|mae yna o|th vlaen y
fford waethaf a|phericlaf o|r yssyd yn yr hoỻ vyt. kanys y+
no myui a gefeis vym brathu trỽydof mal y gỽely di. Pa
ryỽ le yỽ hỽnnỽ heb·y laỽnslot. Arglỽyd heb ynteu ef a
elwir casteỻ y baryfeu. a|r neb a|el y|r fford heb y casteỻ
ef a|vyd reit idaỽ adaỽ y varyf yno. neu ynteu ymlad hyt
ar angheu dros y varyf. ac o achaws ymlad ohonaf|i dros
vym baryf y kefeis i hynn. Myn|vyng|cret heb·y laỽnslot te+
bic yỽ gennyf nat ỽyt wr ỻỽfyr. pan|vei weỻ gennyt. am ̷+
diffyn dy varyf drỽy enryded noc ovyn angheu. Eissyoes
tydi a|vynnassut vyng|gỽneuthur|i yn|wr ỻỽvyr. pan n
vynnassut ymchoelut ohonaf|i drachevyn. eissyoes ys
oed gỽeỻ gennyf vy|marỽ drỽy enryded no thynnv vn o ̷
vleỽ vy|maryf y gennyf drỽy gewilyd. Arglỽyd heb y
| « p 162v | p 163v » |