LlGC Llsgr. Peniarth 11 – tudalen 212r

ar y uedyr ef. neu ynteu a|e dygei ganthaỽ e|hun. Ac ynteu

a|e|gedewis ygyt a|hi am na wydyat pa wlat y damwheinyei idaỽ

vynet. Yr ystorya yssyd yn dywedut marchogaeth ohonaỽ

odyno yny doeth diwarnaỽt hyt yng|kasteỻ y tỽr elydyn. ac

yn|y casteỻ hỽnnỽ yr|oedynt ỻawer yn adoli y tỽr elydyn. ac yn cre+

du idaỽ. a heb gredu dim y|duỽ. Y tỽr hỽnnỽ a daroed y ossot ar

bedeir colofyn o vaen marmor. ac ef a roi breferat ym pob aỽr

o|r dyd ual y clywit hanner miỻtir yn|y gylch. ac yndaỽ yr oed

yspryt drỽc yr hỽnn a attebei y baỽp ohonunt o bop peth o|r

a|ovynnynt. ac ar y porth y fford yd eit y|r casteỻ y|myỽn yr  ̷

oedynt deuwr wedy|r wneuthur o elydyn drỽy geluydyt nigro+

maỽns. ac yn|ỻaỽ bop un yd oed ord o haearn. ac a|r rei hynny

yn ffustaỽ y ỻaỽr bob eilwers yn ffestaf ac y geỻynt hyt nat

oed neb a|lyuassei. nac a amcanei vynet y|r porth rac eu hovyn.

A|r casteỻ heuyt a|oed yn gyn|gadarnet o bop parth idaỽ ac

nat oed neb a aỻei na dyuot y|myỽn na mynet aỻan. onyt

drỽy y porth. ny lyuassei neb ynteu y|r|fford honno vynet.

Paredur a|edrychaỽd ar gedernyt y casteỻ. ac ar beriglỽyd y

porth. ac a|vu ryued ganthaỽ. namyn yr hynny ef a doeth

ar|hyt y bont hyt yn ymyl y mileinyeit elydyn a|oedynt yn

gỽarchadỽ y tỽr. Ac yna ef a glywei lef uch benn y porth yn

dywedut ỽrthaỽ. dabre y myỽn yn|diarswyt ac na vygyla o

dim. ac ynteu a|gyrchaỽd y myỽn. a|r mileinyeit a|beidyas+

sant a|e hymguraỽ. ac ynteu a|doeth hyt y ỻe yd oedynt ỻawer

o|dynyon angcredadun yn eisted ac yn adoli y|r tỽr elydyn.

A|r tỽr yn brefu yn gyn ffestet ac na aỻei neb glywet y gilyd.