LlGC Llsgr. Peniarth 18 – tudalen 67v
Brut y Tywysogion
67v
dyd o|ỽyl veir ymedi y crynaỽd y|dayar yg|kym+
ry am·gylch aỽr echỽyd. Y ulỽydyn honno y|mor+
ỽydaỽd emri vab symỽnt mỽmford. Ac elienor
y chỽaer tu ac gỽyned. Ac ar yr hynt hỽnnỽ.
y delit hỽy y|gann porthmyn haỽrfforth ac y han+
vonet yg|karchar edỽart vrenhin. A|r elienor hon+
no a|gymerassei lyỽelyn yn ỽreic priaỽt idaỽ trỽy
eireu kynndrychol. A|honno trỽy ỽedieu ac an+
noc innocens bap a|bonedigyon lloegyr a|rydha+
ỽyt. Ac yna y|gỽnaethpỽyt priodas lyỽelyn ac Eli+
enor yg|kaer ỽynt. Ac edỽart vrenhin lloegyr
yn costi y|neithaỽr e|hun yn healaeth*. Ac o|r elienor
honno y|bu y lyỽelyn verch a|elỽit gỽenlliant. Ar
dyỽededic Elienor a|uu varỽ y ar etiued. Ac y
hagkladỽyt ymanachloc y|brodyr troetnoeth
yn llann vaes ymon. Ar dyỽededic ỽenlliant
gỽedy marỽ y|that a|ducpỽyt yggkeithỽet y
loeger. A chynn amser oet y|gỽnaethpỽyt ynn
vanaches o|e hanuod. Ar dyỽededic emri a|ryd+
haỽyt o|garchar y|brenhin ac y|duc hynt y|lys
rufein. Y|ulỽydyn racỽynep yd anuones yr ar+
glỽyd lyỽelyn mynych gennadev y|lys y|brenhin
ỽrth ffurhuav tagneued yrygtunt. Ac ny ry+
ymhaaỽd idaỽ dim. Ac yn|y diỽed am·gylch gỽ+
yl veir y canhỽylleu y gossodes y brenhin cỽnsli
yg|kaer yr aghon. Ac odyno yd anuones tri llu
| « p 67r | p 68r » |