LlGC Llsgr. Peniarth 190 – tudalen 76
Ystoria Lucidar
76
y uffern pan vo marỽ y corf hỽnnỽ. Magister Duỽ
yr|hỽnn y mae pob peth. a phob gleindyt gan+
thaỽ. ny chreaỽd dyeithyr eneideu da glan.
a|r rei hynny herỽyd anyan a damunant
vynet yn|y corfforoed. megys y damunỽn
ninneu yn byỽ herỽyd anyan. Eissyoes pan
elont ỽy y myỽn y ỻestyr budyr halaỽc hỽn+
nỽ. kymeint y|gỽnant ỽy y ewyỻys ef. ac
y carant yn vỽy no duỽ. ỽrth hynny pan
vo trech ganthunt ỽy y ỻestyr budyr hỽnnỽ
y maent yng|karchar yndaỽ no charyat
duỽ. Jaỽn yỽ y duỽ eu gỽrthlad ỽynteu o|e
gedymdeithyas ef. discipulus A wybyd yr eneideu a
vont yng|corfforoed y dynyon bychein dim.
Magister|Ef a|darỻeir am Jeuan vedydywr. ry syn+
nyaỽ o|e eneit ef. ac ynteu etto yng|kroth y
uam. ac a|wybu ry|dyuot crist attaỽ. ỽrth
hynny amlỽc yỽ nat oes eisseu synhỽyr ar
y|rei bychein. kyt boet eisseu gỽeithret. discipulus
Paham y gỽelir y corff a|aner o gristono+
gaỽl hat yn vudyr. Magister Am y ry|gaffel o hat
| « p 75 | p 77 » |