LlGC Llsgr. Peniarth 45 – tudalen 151
Brut y Brenhinoedd
151
erhy y urỽydyr. Ac gỽedy delhont o deissyuyt de+
int y llad. Ac o penn y lleỽ y coronheir. yn dydyeu
hỽnnỽ y genir ssarff a ymdywynnyc y angheu y
rei marwaỽl. Oe hyt ef y kylchynna llundein
ac el heibyaỽ a lỽnc. yr ych mynydaỽl a gymmer
penn bleid. A|e danhed a wynnhaa yng gweith mor
hafren. Ef a|gedymdeitha iddaỽ kenueinyoed
yr alban a chymry yr rei a sychant auon temmys
gan y hyuet. Bran a ehetta gyt a|barcutan. ~
A chorfforoed y rei lladedic a lỽnc. Ar uuroed ca+
er gloeỽ y gỽna y bỽnn y nyth. Ac yn|y nyth
y creir assen. hỽnnỽ a uac sarff maluern. Ac
yn llawer o uredycheu y kyffroha. yny bo ky+
meredic y teyrnwialen yd esgyn goruchelder.
Ac o aruthur sein yr aruthra y wlat. yn|y dyd+
yeu hynny y seinyant y mynyded. Ac yd|yspeilir
y kymmydeu oc eu llỽyneu Can daỽ pryf tana+
ỽl anadyl. yr hỽnn a lysc y gwyd yny bo kyme+
redic y gỽlybỽr. O hỽnnỽ y kerdant seith ychen
kymeredic o penneu bycheu. O dryc wynt eu
ffroneu* y llyccant y gỽraged ac y gỽnant yn
priaỽt udunt. Ny ỽybyd y tat y priaỽt uab
Canys o deuaỽt aniueileit y rywedant ỽrth
hynny y|daỽ kaỽr yr enwired yr hỽnn a aruth+
ra paỽb o lymder y lygeit. yn erbyn hỽnnỽ y
kyuyt dreic kaer ỽyrangon a|hỽnnỽ a|uedylya
| « p 150 | p 152 » |