LlGC Llsgr. Peniarth 9 – tudalen 63r
Ystoria Carolo Magno: Chronicl Turpin
63r
llas y dec ychenaỽc ar|ugeint a|e porthi y nos
honno. A chanu dec sallỽyr ar|ugeint a dec effe+
ren ar|hugeint yn anryded y rolond ar niuer
a verthyrỽyt y gyt ac ef yn yr yspayn val y
bydynt rannaỽc ar y coroneu. Ac ỽynt a adaỽs+
sont ar eu llỽ wneuthur hyny. Ac ar hyny yd
ayth charlymayn o vlif hyt yn vien. Ac yno
y bu yn gorffowys ychydic yn kymryt mede+
ginyayth o|y glỽyueu a|y vratheu. Ac o·dyna
yd ayth y baris. Ac yna y goruc kỽnsli yn seint
dynys a|y dywyssogyon ac escyb yn eglỽys se+
int dynys y diolỽch y duỽ ar sant y nerth ar
grym a rodassei idaỽ y estỽng y pagannyeit.
Ac yna y rodes ef holl ffreinc yn darestyg+
edic y seint dynys val y rodassei baỽl ebostol
a|chlemens bap a orchymynyssynt gynt yr
brenhined ar tywyssogyon vuydhau yr eg+
lỽys honno a rodi pedeir keinhaỽc pob bloyd*+
yn o bob ty y adeilat yr eglỽys. Ac a ellyga+
ỽd pob kayth yn ryd yr talu y treth honno.
Ar llawenaf a|y talei a elwit ffranc seint denys.
Ac odyna y gelwit y wlat honno ffreinc. Ach
kyn no hyny galli oyd y henỽ. Sef yỽ deall yr
onỽ* ffranc ryd o geithiwet pob kenedyl. canys
ỽynt a|dylyant vot yn bennaf. ac odyna yd
ayth charlymayn hyt y lle a elwir dỽuyr y gra+
ỽn. parth a leodin. Ac ef a|beris wneuthur enne+
in dogyn y wres heb gilyaỽ yn dragywyd o
geluydyt ac ardymher. Ac eglỽys a adeilyssei
| « p 62v | p 63v » |