LlB Llsgr. Harley 4353 – tudalen 13v
Llyfr Cyfnerth
13v
o|r med. Ef bieu koescyn pop eidon o|r llys.
Ny byd hyt vcharned. Naỽuetdyd kyn kal ̷+
an gayaf y keiff ef peis a chrys a chapan. A the ̷+
ir kyfelin lliein o pen elin hyt ymlaen hir+
vys y| wneuthur llaỽdỽr idaỽ. Ac ny byd ten+
llif yn| y laỽdỽr. Ny byd hyt yn| y dillat na+
myn hyt yg clỽm y laỽdỽr. kalan maỽrth
y keiff peis a| chrys a| mantell a llaỽdỽr. Yn| y
tri amser hagen y keiff penguch. Ef bieu
rannu rỽg y brenhin a|r maer a|r kyghella ̷+
ỽr. Ef bieu yr yscub a| uo dros pen pan ran ̷+
her yt y tayogeu ffoaỽdyr ac eu marỽ·tei.
Pan adaỽ kyllidus ffoaỽdyr y yt heb vedi.
A phan gaffer y kyffelyp o varỽ·ty; y righyll
a geiff y talareu. Ef a geiff y mehin bỽlch a|r
emenyn bỽlch o|r marỽ·tei. A|r maen issaf
o|r ureuan a|r dulin oll a|r llinhat a|r to nes ̷+
saf y|r dayar o|r veiscaỽn. A|r bỽeill a|r crym+
aneu a|r ieir a|r gỽydeu a|r katheu. Torth a|e
henllyn a geiff ef ym pop ty y del idaỽ ar neges
y brenhin. Teir kyfelin a| uyd yn hyt y billo
rac y arganuot. Ef a geiff y tarỽ a del gan
anreith. Pan vo marỽ y righyll; yn truga+
red y brenhin y byd yr eidaỽ. O|r serheir y
righyll o|e eisted yn dadleu y brenhin; talet
| « p 13r | p 14r » |