LlB Llsgr. Harley 958 – tudalen 8v
Llyfr Blegywryd
8v
heuẏt a geif traet ẏ gwarthec oỻ. Ef a|wna
hoỻ|weith ẏ brenhin ẏn|rat. eithẏr tri pheth.
bỽeỻ aỽchlẏdan. A|chaỻaỽr. A|phen gỽaẏỽ
o rei hẏnnẏ gwerth ẏ weith a|geif. kadar+
nach ẏ dẏwedir ẏ keif ef werth ẏ|weith o
gaỻaỽr brenhin. A heẏrn rỽẏm porth ẏ kas+
teỻ. A heẏrn ẏ velin. keinẏon a geif ẏn|ẏ
kẏfedeu. O|pob karcharaỽr oc ẏ diotto he+
ẏrn ẏ arnaỽ pan rẏdhaer pedeir keinhaỽc
a|geif. Ẏ|dir a geif ẏn rẏd. Gwiraỽt kẏf+
reithaỽl a geif. nẏt amgen lloneit ẏ lles+
tri ẏ gwallofẏer ac ỽẏnt ẏn|ẏ ỻẏs o|r cỽrỽ.
Ac eu hanher o|r bragaỽt. Ac eu traẏan o|r
med. Ef a|geif gobreu merchet ẏ gofein hẏt
ẏ bo ẏ sỽẏd. Gobẏr merch gof llẏs ẏỽ chỽe+
ugeint. Gwerth ẏ offer. chweugeint. Cowill
ẏ verch chweugeint a phunt. Y hegwedi
teir punt. Ebediỽ gof ỻẏs. chweugeint.
M Aer bisweil a|geif crỽẏn ẏr ẏchen a|r
gỽarthec a|lather o|r ỻẏs os ketwis ef
ỽẏnt teir nos. Ef a|geif amobreu merchet
ẏ bileineit a uỽẏnt ẏ mẏỽn maertrefi ẏ
ỻẏs. A gwer a blonec ẏscrẏbẏl ẏ ỻẏs. Kẏt
sarhaho ẏ gwassanaethwẏr ẏ maer bis+
weil ỽrth dỽẏn bỽẏt a llẏn o|r gegin ac o|r
uedgeỻ parth a|r neuad nẏ diwẏgir idaỽ.
| « p 8r | p 9r » |