Rhydychen, Llsgr. Coleg yr Iesu 57 – tudalen 136
Llyfr Blegywryd
136
dwy wraged. Pỽy bynnac a|atto y wreic ac a|vo
ganthaỽ. a hitheu gỽedy y rodi y|wr araỻ. Os
gordiwed y gỽr kyntaf hi a|r neiỻ|troet myỽn y
gỽely. a|r ỻaỻ y maes. y gỽr kyntaf o gyfreith
a|e keiff. O r gỽatta gỽreic y godineb. rodet lỽ
deng wraged a deugeint. ac ueỻy y gỽr a|watto
y odineb. ỻỽ deng wyr a deugeint a dyry. ac y dri
chadarn enỻib y rodir y reitheu hynny. O|r
byd y wreic achaỽs dybryt a|gỽr araỻ. ae o gus+
san. ae o vot genthi. ae o|e phaluu. y gỽr a|dicha+
ỽn y gỽrthot. a hi a|dyly coỻi y hoỻ dylyet o
rodi cussan idi heb un o|r rei ereiỻ. O r kyttya
gỽr a gỽreic araỻ. talet idaỽ y sarhaet gan y
hardyrchauel vn·weith. kanys o genedyl elyny+
aeth yỽ. Dros y phalualu y telir sarhaet dan
y hardyrchauel. Dros y cussan. traean y sarha+
et a vyd eisseu. kany bu weithret cỽbyl y·ryng+
thunt. nac o|dỽyỻofein idi. na pha wed bynnac
y rodit idi gussan. Y neb a|gussano gỽreic gỽr a+
raỻ. talet y bedwared rann y sarhaet idi. ac
| « p 135 | p 137 » |