Rhydychen, Llsgr. Coleg yr Iesu 57 – tudalen 71
Llyfr Blegywryd
71
1
yaeth. a|gỽreic a roder o rod kenedyl y aỻtut.
2
a|gỽreic a lader gỽr o|e chenedyl. a|dial o|e mab
3
hitheu hỽnnỽ. ny dylyir y|oedi am|dref y uam.
4
nac aros naỽ·uettydyeu yn|y erbyn. Teir sar+
5
haet gỽreic ynt. vn a|dyrcheif. ac vn a|ostỽng.
6
ac vn yssyd sarhaet gỽbyl. vn yỽ bot genthi
7
o|e hanuod. a|honno gan vn ardyrchafel y|telir.
8
ac os gỽryaỽc vyd herwyd breint y gỽr y|telir
9
idi. Yr eil yỽ. rodi cussan idi o|e hanuod. a
10
honno a|ostỽng. y traean a vyd eisseu. Try+
11
ded yỽ; y phaluu o|e hanuod. a honno yssyd
12
sarhaet gỽbyl idi. Tri chewilyd kenedyl ynt
13
ac o|achaỽs gỽreic y maent. ỻathrudaỽ gỽ+
14
reic o|e hanuod. Eil yỽ dỽyn o|r gỽr wreic
15
araỻ ar y phenn y|r ty. Trydyd yỽ. y hys+
16
peilaỽ. Tri chadarn enỻib gỽreic. vn yỽ.
17
gỽelet y gỽr a|r wreic yn dyuot o|r vn ỻỽyn. vn
18
o|bop parth y|r ỻỽyn. eil yỽ eu kaffel yỻ|deu
19
dan vn uanteỻ. Trydyd yỽ. gỽelet y gỽr y+
20
rỽng deu uordwyt y wreic. Tri chyffro di ̷+
21
al
« p 70 | p 72 » |