LlGC Llsgr. Llanstephan 27 (Llyfr Coch Talgarth) – tudalen 115v
Efengyl Nicodemus
115v
kanys enr·y·uedaỽt maỽr yỽ gennym ni mal y|th gymerspỽyt
y gennym. ni a wdam na bu vỽyn yn kyngor na|n medỽl
y|th erbyn di. a duỽ a|th rydhaaỽd yn diheu o|n dryc·ewyỻys
ninneu. Tangneued ytt arglỽyd Joseph. enrydedus ỽyt y gan
yr hoỻ blỽyf. ac ethol seithwyr o|r rei kedymdeithassaf gan
Joseph. a dywedut ỽrthunt. pan deloch att Joseph. annerchỽch
ef yn tangneued. a rodỽch attaỽ yr ebostol honn. A phan doeth
y gwyr attaỽ. ỽynt a|e hannerchassant gan dangneued. a rodi
idaỽ libel yr ebostol. A|gỽedy darỻein yr ebostol o·honaỽ. dyw+
edut a|oruc Joseph. Bendigedic uo duỽ yr israel hyt na oỻyngei
vyng|gwaet i. Bendigedic ỽyt duỽ ual yr amdiffyn·neist di vi
y·dan adein dy esgyỻ. Ac odyna cussanu o Joseph y gỽyr a|dath+
oedynt attaỽ ac eu dỽyn y ty. a|r dyd hỽnnỽ yd esgynnaỽd ar
y assen. ac yd aeth y·gyt ac ỽynt hyt yng|kaerussalem. A phan
gigleu yr Jdewon hynny. dyuot a|oruc paỽp yn|y erbyn a|dywet+
ut ỽrthaỽ. Tangnefed y|th dyuotyat dat. ac yn atteb udunt y
dywaỽt Josep. Tangnefed y baỽp o·honaỽch chỽitheu. a|mynet
dỽylaỽ mynỽgyl idaỽ a|orugant. a nichodemus a|e kymerth y
ty. a|gỽneuthur kyfedach udunt. A thrannoeth yr ymgynnuỻ+
aỽd yr Jdewon y·gyt. a dywedut ỽrth Joseph o annas a chaiphas.
Dyro dy gyffes y duỽ yr israel. a manac ynni bop peth o|r
a ovynner ytt. kanys am gladu corff Jessu yd artystassam
arnat ac y|th ossodassam yng|karchar. ac am y vot yn sa+
dỽrn. ac ym·penn y trydyd dyd pan y|th geissassam ny|th
gaỽssam. a ryuedaỽt uu gennym ni hynny yn vaỽr. Ac
ovyn a|vu arnam yr|hynny hyt hediỽ yd yttym y|th gaffel.
ac weithyon y|th gyndrycholder yng|gwyd duỽ manac ynn
| « p 115r | p 116r » |