LlGC Llsgr. 3035 (Mostyn 116) – tudalen 130r
Brut y Brenhinoedd
130r
araỻ arthur a ossodes y lu ynteu drỽy naỽ bydin a gorch+
ymyn y baỽb ohonunt ac anoc ỻad y ỻadron tỽyỻwyr
yscymun a dathoedynt o|wladoed ereiỻ o dysc y bradỽr
y geissaỽ y digyuoethi ynteu A|r bobyl a welỽch racco
heb arthur a|r gynuỻỽyt o|wladoed amryfaelon ac ag+
hyfyeith ynt a|ỻesc ac a·ghyfrỽys ar ymlad Ac ny aỻant
gỽrthỽynebu yỽch. kanys kyfrỽys yỽchi. Ac veỻy paỽb
o·nadunt yn anoc y|wyr o|r parth araỻ Ac yn deissyfyt
ym·gyfaruot a|wnaeth y bydinoed y·ghyt A|dechreu
ymlad a newityaỽ dyrnodeu yn vynych. A chymeint
vu yr aerua yna o pop parth. Ac megys yd oed gỽynuan
y rei meirỽ yn kyffroi y|rei byỽ ar lit ac ymlad Ac me+
gys yd oed blin a|ỻafurus y yscrifenu na|e datkanu
kanys o|pop parth y brethynt ac y brethit ỽynteu vynt
a ledynt ac ỽynt a|ledit. Ac o|r diwed gỽedy treulaỽ ỻa+
wer o|r dyd yn|y mod hỽnỽ. Arthur a|e vydin a|gyrchỽys
y vydin y gỽydyat bot y|tỽyỻỽr gan vedraỽt yndi
Ac a·gori fyrd vdunt a|r clefydeu. Ac yn dianot my+
net drostunt a gỽneuthur tristaf aerua onadunt. ka+
nys y·n|y ỻe y|dygỽydỽys yr yscymynedickaf uradỽr
hỽnỽ gan vedraỽt a ỻawer o vilyoed y·gyt ac ef Ac
eissoes yr hyny ny foyssant y rei ereiỻ. Namyn ymgyn+
uỻaỽ y·gyt o|r maes oỻ Ac yn herwyd eu gleỽder
keissyaỽ ymgynhal a gỽrthỽynebu y arthur Ac ỽrth
hyny gỽychraf a|girattaf a|chreulonaf aerua a vu y+
rydunt yna o pop parth Ac eu bydinoed yn syrthyaỽ
Ac yna o|pop parth y vedraỽt y|syrthassant cheldric
ac elafyỽs. egberinc brenhin o|r saesson. O|r gỽydyl
giỻapadric. giỻamỽri giỻasel giỻamor Yr yscotteit
a|r fichteit a* |ỽynt ac eu harglỽydi hoỻ hayach a las.
| « p 129v | p 130v » |