LlGC Llsgr. 3035 (Mostyn 116) – tudalen 130v
Brut y Brenhinoedd
130v
Ac o bleit arthur y|ỻas Osbrinc brenhin ỻychlyn. Echel
brenhin denmarc. kadỽr ỻemenic jarỻ kernyỽ. kaswaỻ+
aỽn. A|ỻawer o vilyoed ygyt ac ỽynt rỽg y brytanyeit
a|chenedloed ereiỻ a ducsynt ygyt ac ỽynt. Ac ynteu yr
arderchaỽc vrenhin arthur a vrathỽyt yn agheuaỽl
ac a|ducpỽyt o·dyna hyt yn|ynys a·uaỻach y jach·au y
welieu. Coron y teyrnas o ynys. prydein. a gymynỽys ynteu
y gustenhin vab kadỽr jarỻ kernyỽ y|gar. Dỽy vlyned
a deugeint a|phump cant gỽedy dyfot crist yg kanaỽt
dyn oed hynny yna ~ ~ ~ ~ ~ ~ ~
A c gỽedy bot custenhin yn arderchaỽc o goron y|te+
yrnas. Y|kyfodassant yn|y erbyn y|saesson a deu vab
vedraỽt gantunt Ac ny aỻassant gỽrthỽynebu
idaỽ. namyn gỽedy ỻawer o ymladeu vn o·honunt a
foes hyt yn ỻundein. A|r ỻaỻ y gaer wynt A|dechreu
kynal y rei hyny arnadunt. Ar* yn yr amser hỽnỽ y
bu varỽ Deinẏoel sant escob bangor. Ac yna y gỽna+
ethpỽyt. Theon escob kaer loyỽ yn archescob yn ỻun+
dein. Ac yn yr amser hỽnỽ y teruynỽys dewi arches+
cob kaer ỻion o|r vyched vydaỽl hon Ac y|cladỽyt y
mynyỽ yn|y vynachlaỽc e|hun. ym|plith y gyt·vrodyr
kanys mỽyaf ỻe yn|y archescobaỽt ef a garei oed
hỽnỽ. Ac o arch maelgỽn gỽyned yn yr eglỽys hono
y|cladỽyt Ac yn|y le ynteu yn archescob yd etholet
kynaỽc escob ỻan badarn Ac y drychafỽyt yn enryded
A c o·dyna custenhin a|ymlityaỽd [ a oed vch ~
y|saesson ac a|e darestygỽys ỽynt ỽrth y gygor
A|r dinassoed a gafas a|r neiỻ mab y vedraỽt a|la+
daỽd yg|kaer wynt rac bron yr aỻaỽr yn eglỽys am+
phibalus A|r ỻaỻ a|las yn ỻundein rac bron yr aỻaỽr
| « p 130r | p 131r » |