LlGC Llsgr. 3036 (Mostyn 117) – tudalen 163
Brut y Brenhinoedd
163
gan erlit a greiff a dysc samuel proffỽyt am agag
vrenhin amalec a|oed yg carchar ac yn|y vedyant.
Sef a oruc y vriwaỽ yn drylleu gan dywedut val
hyn. megys y gỽnaethosti mameu ymdiuat oc
eu meibon; velly y gỽnaf inheu dy vam titheu
yn ymdiuat o·honot titheu ym plith y|guraged.
A gỽneỽch chwitheu y uelly y hỽn. yr hỽn a ymdan+
gosses yn eil agac yn an plith ninheu. Ac yna
y kymyrth eidol iarll kaer loyỽ hengyst ac yd aeth
ac ef odieithyr y|gaer. Ac y lladaỽd y pen a chledyf.
Ac yna mal yd oed emreis yn waredoccaf o|r gỽyr
erchi a oruc y|gladu a|gỽneuthur cruc maỽr o|r day+
ar ar y warthaf. mal yd oed deuaỽt gan y pagany+
eit cladu eu meirỽ. Ac odyna kychwyn a wna+
eth emreis a|e lu parth a|chaer efraỽc y ymlad ac
octa uab hengyst. A guedy y|dyuot yno. kylchy+
nu a oruc y gaer a dechreu ymlad a hi. A guedy
guelet o octa na allei gynhal y|gaer rac emreis.
sef y kauas yn|y gyghor ef a|e henhafgỽyr. kym+
ryt kadỽyneu yn eu llaỽ a dodi tywaỽt yn eu
penneu yn lle kymun udunt. A mynet yn ewyll+
is a thrugared y brenhin. gan dywedut yr ym+
adraỽd hỽn. Gorchyuygedic ynt an dỽyeu ni. Ac
ny phedrussỽn ni bot dy duỽ ti yn guledychu.
yr hỽn yssyd yn kymhell y ssaỽl vonhedigyon
hyn y dyuot y|th ewyllis ti yn|y wed hon. Ac ỽrth
hynny kymer y gadỽyn hon. Ac ony myn dy tru+
| « p 162 | p 164 » |