LlGC Llsgr. Peniarth 11 – tudalen 130r

heb·y gỽalchmei. Y marchaỽc urdaỽl eil goreu o|r hoỻ vyt

bieu. A wdost di heb·y gỽalchmei dywedut ymi chweith di+

heurỽyd y ỽrthaỽ ef. Na|ỽnn heb ynteu namyn hynn. ef a|dy+

ly dỽyn taryan liwedic o eur ac assur. a|chroes goch trỽydi a

bogel o eur yn|y pherued. a|mi a dywedaf y vot yn|varchaỽc

urdaỽl da. ac ny dylyỽn i y dywedut kanys ef a|ladaỽd vyn

tat i yn|y fforest honn a|gaflach. a|hynny heb y rybudyaỽ. a

mab yttoed ef yna. a minneu a dialaf hynny arnaỽ. o|r byd

ym vod y ymgyfaruot ac ef. ac ny bydaf vyth lawen yny

darffo ym y dial. a vnbenn heb·y gỽalchmei kanys gỽdost di

y vot ef yn gyn|gadarnet ac yn|gystal marchaỽc ac y mae ~

mogel rac gỽneuthur dy afles dy hun. a mi a|vynnỽn dar +~

uot ytt ymgael ac ef dan amot na bei chỽeith drỽc y·ryngoch

Ny byd hynny vyth heb·y gỽas pa le bynnac y gỽelwyf i ef na

rettỽyf am y benn megys am benn vy|ngelyn marwaỽl. a

vnbenn heb·y gỽalchmei dy ewyỻys yd|wyt yn|y dywedut.

a dywet ym unbenn a|oes chweith kyuanned yn|y fforest honn

yn|y ỻe y gaỻwyf lettyaỽ heno. Arglwyd heb·y gỽas ny ỽnn i

yr vn o hynn hyt ar vgein miỻtir. ac y|mae yn hỽyrhau. Y+

na kychwyn a|oruc gỽalchmei ymeith heb wybot pa|le yd|aei.

namyn mal y dyckei y anturyeu. a hoff oed ganthaỽ decket y

fforest. ac amlet yr aniueilyeit gỽyỻtyon yn mynet hebdaỽ ỽrth

varchogaeth. ac ueỻy marchogaeth a|oruc ef yny yttoed yn bryt gos+

ber. ac neur|daroed idaỽ marchogaeth vgein miỻtir yr pan ymwa+

hanassei y ỽrth y gỽas. Yna ovyn a|vu arnaỽ na chaffei chweith