LlGC Llsgr. Peniarth 15 – tudalen 5

heb ef orfwẏssva yr hwn a|wnaeth kynnwrf y|ni ac ẏ|n kenedel pa ryw

ogonẏant ẏsẏd ydi hi yr awr hon a|n·essav a|orvc ar yr elor ar arvaethv

 th ẏmchwelvt y|r llawr a|dodi y|law arnei Ac yn ddiannot y|difrwyth+

awd y|dwẏlaw hẏt ben ẏ|elined ac ẏ|glẏnassant wrth ẏr elor Ac ẏm+

dibẏnnẏaw wrthi a|orvc a|r ebystẏl ẏn|ẏ lvsgẏaw wrthi ac n|y dolvr+

ẏaw yn boenedic ac val yd|oeth yr ebystyl yn kerdet gan ddirvawr

lewenẏd a|molyant y|r arglwyd ẏr engylẏon yn yr wybyr odvw+

ch ẏ penn a ddallawd ẏ|bobẏl a dathaoed* yn ev herbẏn o|r dinas

Ac ẏna ẏ dechrevawd tẏssyawc* ẏr offeireit yr hwn a|lynassei ẏ|dwẏ+

law wrth yr elor llefein a|gweidi ar beder a|dẏwedvd val hẏn Mi a|th|we+

diaf val hẏn ẏn|ẏ govvt hwn hẏt na|thremẏckẏch di vi·vi koffa hevyt

pan yttoed ẏ|vorwyn wrth ẏ drws y|th arganvot ac ẏ|th voli di a dywe+

dvt ohonof|i drossot ti yna yn|dda ac wrth hẏnnẏ yr awr honn ẏd adolẏ+

gaf inhev ytti vot yn drvgarawc wrthẏf trwẏ dẏ arglwẏd di ac

ẏna y|dẏỽat peder ỽrthaw nyt oes ẏn·ni veddẏant n |ẏ bẏt namẏn

o|chredy|di y|dvw ac iessv grist a arwedaỽd honn an arglwyd nẏnheu

ef a|ellygir dẏ dwẏlaỽ ẏ wrth yr elor ac ynteỽ a attebaỽd ẏna ẏ|bedẏr

val hynn. Ponẏt ydẏm ni ẏn kredv a|pha|beth a|wnaỽn nẏnhew o|dallea+

ỽd kenedẏl dẏnyỽl* yn kalonnoed val na|chrettom ẏ wẏrthẏeỽ dvw ac

yn|bennaf oll pann dẏỽedassam yn er·byn krist oc an llef ẏn dywedvd

Bit dẏ waet arnam ni ac ar yn meibon ỽedy ni a|mann ẏ|pechaỽt

diruaỽir* hwnnw yssyd val glvt vrthẏm. Peder a|attebaỽd yna idaw

val hẏn yr emelltith honno hep ef a argywyda y|r neb ny|chretto namẏn

y|barahv yn diffẏlaỽnn* ẏ neb hagen a ẏmhỽelho a|chredv nẏ nekeeir ef

o|drvgared ac ynteỽ ẏna a attebaỽd ẏ|bedẏr ac a|dyỽat wrthaw val hyn

Mi a|gredaf ep ef pob peth o|r a|dẏỽedẏ gann drugarahv* ohonot vrthẏf

val na bỽẏf varw ac gwedẏ seuẏll pedẏr ar elor ẏ|dyỽat tẏỽyssawc

ẏr offeyeit* mi a|gredaf hep ef ẏ vab dvw yr hwn a y·mdvc hon yn

y|brv ac y iessv grist an harglwyd ni ac ar hẏnnẏ ẏn diannot y|rẏdhaỽyt

ẏ|dwylaỽ ẏ|wrth yr elor ac eissoeis* y|ỽreichev a oedynt diffrỽẏth ettỽa

ac nẏt yttoed heb|dolvr arnaw ac yna ẏ|dyỽat peder vrthaw dẏnessa

heb ef at ẏ corff a|chvssana yr elor a|dẏỽet Mi a|gredaf ẏ iessv grist

vab dvw an arglwyd ni yr hwn a ymdvc honn ẏn|ẏ brv ac a|vv yr

hẏnnẏ wẏrẏ gwedẏ escor val kẏn escor a|phann daroed idaw

dyỽedvt hynnẏ a|rodi y|enew wrth ẏr elor ẏ kavas ẏ holl iechyt ac

yn dechrevawl moli dvw a|orvc yn vawrydic a dwyn tystolyaeth a|orvc

y|veir o|lẏvẏr ẏr hendedef* ar ẏ|bot hi ynn dẏmẏl ẏ|dvw a chymeint a dy+

ỽat ef o|e darogan hi ẏnẏ oed yr ebystyl ẏn wylaỽ rac meint y|llewenẏd