LlGC Llsgr. Peniarth 31 – tudalen 28r
Llyfr Blegywryd
28r
Tri anhepcor breyr; y telyn. a|e vryccan. a|e
gallaỽr. Tri anhepcor tayaỽc. y gauan. a|e tro+
thu. a|e talbren. Tri pheth ny chyfran brenhin
a neb; y eurgraỽn; a|e hebaỽc. a|e leidyr.
TRi phetwar yssyd; kyntaf ynt. Petwar
achaỽs yd ymhoelir braỽt; o ofyn gỽyr
kedyrn. A chas galon. A charyat kyueillon. A
serch da. Eil petwar yỽ; pedeir taryan a a y
rỽng dyn a reith gỽlat rac haỽl letrat. vn yỽ
o·honunt kadỽ guestei yn gyfreithaỽl. nyt am+
gen noe gadỽ o pryt gorchyfayrỽy hyt y bore.
A dodi y laỽ drostaỽ o|e gywely teir gweith y nos
honno. A hynny tygu o·hanaỽ a dynyon y ty
yn|y reith. Eil yỽ geni a meithryn. Tygu o|r
perchennaỽc ar y trydyd o wyr vn vreint ac
ef. gwelet geni yr aniueil a|e veithryn ar y he+
lỽ heb y vynet teir nos y ỽrthaỽ nac o rod nac
ar werth. Trydyd yỽ gwarant. Petweryd yỽ
kadỽ kyn coll. A hynny gỽneuthur o|r dyn ar
y trydyd o wyr vn vreint ac ef. kyn colli o|r
llall y da; vot y da hỽnnỽ yn|y helỽ ef. Nyt
oes warant namyn hyt ar teir llaỽ. Ar try+
ded amdiffynet trỽy gyfreith. Trydyd petwar
yỽ; y petwar dyn nyt oes naỽd udunt yn
| « p 27v | p 28v » |