LlGC Llsgr. Peniarth 36A – tudalen 20v
Llyfr Blegywryd
20v
werth onyt bugeilgi vyd. A hỽnnỽ tri
vgeint a tal or raculaenha yr yscrybyl y
bore a dyuot yn eu hol y diwedyd ac eu
kylchynu teir gỽeith yn| y nos. a gallu oe
perchen a chymodaỽc vch drỽs ac arall
is y drỽs kadarnhau hynny yn wir.
Kostaỽc kyt bo brenhin neu vreyr bieiffo
vn werth vyd a chostaỽc bilaen. Ki kall+
awed or lledir bellach naỽ kam y ỽrth y
ty. ny thelir dim ymdanaỽ. Os o vyỽn
y naỽ kam. pedeir ar| hugeint a tal.
Bitheiat nyt oes werth kyfreith arnaỽ.
kanyt oed y kyfryỽ gi hỽnnỽ yn oes
hywel da. gỽerth damdỽg a uyd ar pob
peth ny bo gỽerth kyfreithaỽl arnaỽ yn
yscriuenedic. Or kyrch ki ar dyn dodet
y dyn y aryf rydaỽ ar ki. Ac or a ar yr a ̷+
ryf; hyny lather. ny thelir dim drostaỽ
Or brath ki dyn hyny del y gỽaet. per ̷+
chen y ki. a dyly talu gỽerth y gỽaet yr
brathedic. Ac or llad y dyn brathedic y ki
kyn y dianc y ỽrthaỽ. ny cheiff onyt vn
ar pymthec dros y waet. Ki keneuodic
| « p 20r | p 21r » |