LlGC Llsgr. Peniarth 5 (Llyfr Gwyn Rhydderch, rhan 1) – tudalen 37v

nas arnadunt. canys caeat oed yna yr yn oes esdias proffuyt a| e caeassei. Guedy distryv o genedyl

babilonn y doeth paub o genedyl yr ideon adan ierermias prophvyt. Ac yno y gogylchynnvys titus a vas+

pasian y dinas a llad a gaussant onadunt. a thra yttoed y dinas yn warchaedic heuyt. newyn a lad+

avd rann vaur o| r ideon. a mynet yg kynhor a orugant a dyvedut. bot yn well vdunt eu dienydy+

av e| hunein no bocsachu estraun genedyl oc eu lladua ohonam. Ac yna y lladaud pob vn onadunt

y tat. Sef vu riuedi a las onadunt triugein mil. a| r lleill a trigyassant ygyt a philatus yn y gaer yn

gymeint eu newyn ac yd yssynt yr henn gruyn y amdanatunt. ac eu hen ffellych. Odyna y ty+

uaud ymotwrd yrygtunt am na ellynt bot yn y gaer rac y calanaed ry ledyssit yndi a dyvedut

yryctunt. Pa beth a wnaun ni llyman weithon nyni yn angheu canys dugam ninheu grist y agheu.

Vuydhaun vdunt a rodun vdunt agoryadeu y dinas. agattoed wynt a arbedant yn. ac yna y ar

y gaer y byryassant yr agoryadeu. a dyvedut vrth y tywyssogyon. Llyman y chvi agoryadeu y di+

nas canys guelun bot an gulat yn einvch. Ac yna y kymyrth titus a vaspasian y gaer. a phob+

yl yr ideon. ac eu gwraged ac eu meibon. a daly pilatus a orugant a gouyn idav. Paham hep

wynt a thi yn bennyadur ac yn tywyssauc y|gwlat iudea. ac yn gvybot kyureithreu. nat ofyn+

haut ti lad mab duv. Glan y wyf|i hep y pilatus o waet hvnnv. Eyr ideon a| e barnnvys ac eu march+

ogyon a| e croges. ny leuesseis inheu y ellvng ef rac ovyn. Heruyd pa gyureith hep wynt y ber+

neist|i euo. neu pa delv y kerdvys y dadyl ef. Manac yni. Vn o| e disgyblonn hep y pilatus a| e guerthvys

yr dec ar hugeint o aryant ac yn y groc y poenet ac y brathvyt a| e dillat a rannwyt yn bedeir rann.

Val y gwnnaethant hwy y grist hep y titus a vaspasian. ninheu a| e gwnavn amdanunt hvy. Rei

onadunt gan eu poeni a ladassant a gvavar. Ereill gan rodi gwin egyr vdunt a dagassant. neu

a vygassant. Ereill a grogassant. Pa beth weithon a wnaun i hep y vaspasian y hynn o wedillonn.

Val y gwnnaethant hvy grist yr dec ar hugeint o aryant. Val hynny y guerthun ninheu dec

idev ar hugeint yr vn geinnauc aryant. ac val hynny y gvnaethant. Pa beth weithon a vnavn

ni heb·y vaspasian. Pedeir rann hep·y titus a orugant wy o| e dillat ef. a ninheu a| e rannvn hvy y

bedeir bann y byt. Bit rann ytti. arall y minheu. a| r tryded rann y| th wyr di. a| r betuared rann

y| m gvyr inheu. ac val hynny y rannassant. A cheissav a wnnaethant y wreic yd oed gosgeth yr

argluyd genthi. ac y dugant y arnei kyt bei anuod genthi. a rwymav pilatus ac anuon pob peth

o hynny y rufein hyt at tyber amperavdyr. Pan welas veronic hynny mynet a oruc hitheu yn ol y dre+

ch. a| r niuer a anuonet a doethant truy vordvy hyt yn rufein ynn y lle yd oed yr amperavdyr. a dat+

canv idav pob peth o| r a daroed o| r dechreu hyt y dived. a| r gwyrtheu a oruc kynn y diodef ar gy+

vodi ohonav yn vyv wedy diodef. a| r delo yd ysgynnvys y nef a phaup yn edrych arnav. ac ym penn

y deugeinet diwarnnavt wedy y gyuodi o veirv. a| r delo y rydhaud titus o| r cranc gan gredu idav.

Ac val y dialvys ynteu ar yr ideon y agheu ynteu. Anryued vu hynny gan yr amheravdyr.

a dyvedut. Byv yv yr argluyd. pei ry allysson ni welet y prophuyt hvnnv. ef a allassei vy iachau i. o

glauri yssyd arnaf. Hep y kynnadeu. titus a vaspasian a anuonassant atat drech yr argluyt

hvnnv yr honn a gymerassei wreic y ganthav ar liein o| e gareat. a rydhaassei ynteu hi o heint ry

vuassei arnei ys deudeg mlyned hep allu gvaret idi o nep. ac a vei a heint arnav o| r a welei y drech]

honno a geffynt iechyt yn diannot. Dangossuch chuitheu ymi y drech hep yr amperavdyr. ac

yn diannot y dugant y drech rac y vronn. A veronic a ganhlynnvys y drech. A llaver o dynyon

heinnvs ry doethoed yno yr disguyl ar hynny. A phan dattoded rac bronn yr amperavdyr dodi y

enev vrth y drech. ac yn diannot caffel iechyt o| r clauri a oed arnav. A phaub o| r a doethoed eno

a gaussant iechyt o ba gyuryv heint bynnac a vei arnunt. a thalu dioluch a oruc yr amperavdyr

y| r argluyd iessu grist a dangosses y trugared yr a obeitho yndav. ac a doeth yno a oedynt yn

moli duw. Ac yna y gouynnvys yr amperaudyr. pa vedyant y croget ef ydanav. Adan vedyant

pilatus o ynys bont hep y kennadeu. Paham hep yr amperavdyr na dugauch chuitheu hvnnv

attaf|i. Mae ger dy vronn hep y kynnadeu. Ac ena y ducpvyt pilatus attav. Pa beth a geueist|i

ar grist pan y diennydyut hep yr amheravdyr. E genedyl e| hun ac esgyp y wlat a| e rodes ef ymi.

A minheu a ovynnheis vdunt vy pa guhudet a dodynt hvy yn y erbyn ef. Ni a| e caussam hep

wynt yn trossi an kenedyl y ar eu dedyf. ac yn guahard rodi teyrnget y| r amperavdyr. ac eissoes