Llsgr. Caerdydd 1.363 (Hafod 2) – tudalen 195v
Brut y Brenhinoedd
195v
yhaỽ henny a|e kolly. kanys kenedyl saysson er hon
eyryoet trwy y brat a|e thwyll a|e dystrywyaỽd.
Ac wrth henny y weythyon mwyhaf oll pan kanh+
ayter vdvnt arverv o coron tywyssogaeth en er enys
honn. kanys pan klywer bot enw brenyn vdvnt sy+
berwach ỽydant. ac eỽ kywdaỽt a wahodant
attadỽnt trwy rey e gallont dystryv en kene+
dyl nynhev. kanys en wastat e gnotaassant bot
en vratwyr. ac ny allant kadv ffydlonder w+
rth nep. Ac wrth henny yavnach a dyledvssach
oed ev kywarssangv ac eỽ darystwng y kenny+
m ny noc eỽ hardyrchaỽael. pan ettelys Gorth+
eyrn wynt en kyntaf megys y ymlad tros e
wlat. ac eyssyoes pan allassant wy kyntaf
talỽ drvc tros da wynt a dangossassant ev
twyll ac ev brat ac a ladassant en kenedyl o dy+
wal aerỽa. Eylweyth wynt a vredychassant
emreys wledyc. Wynt a vredychassant arthvr
pan dvunassant a medraỽt y ney. Ac o|r dywed
wynt a dvgant Gotmvnt am penn keredyc
ac a|e dyholassant. ac a dvgant e wlat rac y dy+
ledogyon.
| « p 195r | p 196r » |