Rhydychen, Llsgr. Coleg yr Iesu 57 – tudalen 128
Llyfr Blegywryd
128
yn|y hengwedi. a chỽeugeint yn|y chowyỻ. a
phedeir ar|hugeint yn|y gobyr. Os gỽedy seith
mlyned y gat. bit rann deu hanner y·ryng+
thunt. o·nyt breint a|dyry ragor y|r gỽr. Deu+
parth y plant a daỽ y|r gỽr. a|r traean y|r vam.
yr hynaf a|r Jeuaf. Os angheu a|e gỽahan. bit
rann deu hanner y·ryngthunt o|bop peth.
Sarhaet gỽreic wryaỽc. herwyd breint y|gỽr
y diwygir idi. nyt|amgen herwyd y gỽr y roder
idaỽ. Gỽr a|dichaỽn yn ryd gadu y wreic yn
ryd. o|r gỽna hitheu yr gỽr araỻ ar honneit
ny cheiff hi dim o|e hyaỽn. namyn y tri|pheth
ny dygir rac gỽreic. a|r gorderch a|dal y sarhaet
y|r gỽr kyfreithaỽl. O|r dyweit gỽreic geir keỽ+
ilydyus ỽrth y gỽr. talet y|r gỽr teir bu camlỽ+
rỽ. kanys y harglỽyd yỽ. neu traỽet y gỽr hi
a|gỽialen kyhyt a|e gyvut tri dyrnaỽt y ỻe
y mynno dieithyr y phenn. O|r maed gỽr y
wreic heb achaỽs. talet y sarhaet idi herỽyd
y breint. Ot edeu gỽreic wely y gỽr heb achaỽs
| « p 127 | p 129 » |