Rhydychen, Llsgr. Coleg yr Iesu 57 – tudalen 169
Llyfr Blegywryd
169
traean y werth y|r prynaỽdyr. Y neb a|varchockao
march dyn araỻ heb y gannyat. talet y|r per+
chen pedeir keinyaỽc ysgyn. a|phedeir disgyn.
a|phedeir dros pob rantir a|uarchockao drosti
a|chamlỽrỽ y|r brenhin. Pỽy bynnac a differo
march rac ỻeidyr. pedeir keinyaỽc a|dyly y
gan y perchen ynghyueir pob buch o|r|a|dalo
y march pei gỽerthit. Y neb a|venffyckyo ~
march y araỻ hyt yn ỻe teruynedic. ot a hỽn+
nỽ a|vo peỻach ac ef. talet y|r perchen hanner
yr enniỻ a|gaffo o vyỽn hynny. Y neb a|gymero
benffic march. a llygru y geuyn yny dygỽydo
y vleỽ yn hagyr. pedeir keinyaỽc. kyfreith. a|dal y|r per+
chen. O|r hỽyda hagen o|adlo henỻỽgyr. a|thorri y
croen ar y|geuyn|hyt y kic. wyth geinyaỽc. kyfreith. a|dal.
Ony byd henỻỽgyr arnaỽ ynteu. a thorri croen
a|chic hyt asgỽrn. un ar|bymthec kyfreith a|dal.
O en tra dynho. keinyaỽc. kyfreith. a|dal. Pan wa+
haner. dỽy geinyaỽc. kyfreith. a|dal. aỽst pedeir
keinyaỽc. kyfreith. Teithi dauat. kymeint a|e gỽerth yỽ.
| « p 168 | p 170 » |