Rhydychen, Llsgr. Coleg yr Iesu 57 – tudalen 50
Llyfr Blegywryd
50
urdeu kyssegredic. neu ỽrth greuyd. neu yn
glafỽr neu yn vut neu yn ynuyt. ny thal
dim ac nyt erbyn dim dros alanas. ac ny
dylyant ỽynteu dial neb o|r a|lader. ac ny
dylyir gỽneuthur dial ar vn o|r rei hynny
dros alanas. ac ny eỻir eu kymeỻ o vn
fford y talu. nac y erbynnyaỽ dim dros ala+
T Ri dygyngoỻ kenedyl ynt. vn yỽ [ nas.
dechreu o welygord talu galanas
dyn a|ladher. ac na thalont gỽbyl. ac am
hynny ỻad vn o|r welygord honno. ny thelir
galanas hỽnnỽ. ac nyt atuerir dim o|r a
dalỽyt dros y kyntaf. Eil yỽ. pob kyssỽ+
ynuab y myỽn kenedyl. heb y wadu heb
y dỽyn. a ỻad dyn o|hỽnnỽ. talu yr alanas
a vyd reit oỻ y|r genedyl honno drostaỽ. ac
os gỽadant gỽedy hynny dygyngoỻ yỽ.
Trydyd yỽ. pan enỻipier gỽirion am ge+
lein. ac na wnel iaỽn am hynny namyn
tremyc. o|r ỻedir hỽnnỽ ny thelir dim dros+
taỽ.
| « p 49 | p 51 » |