Rhydychen, Llsgr. Coleg yr Iesu 57 – tudalen 93
Llyfr Blegywryd
93
tir ym|pob|ỻys kymỽt neu gantref o|deheubarth.
nyt amgen pob perchennaỽc tir. Pob braỽdỽr
sỽydaỽc a geif pedeir keinyaỽc. kyfreith. dros bop braỽt
o|r a|dalo kymeint a|hynny y gan y neb y barno
idaỽ. Braỽdỽr o vreint tir hagen ny cheiff gỽerth
dros y vraỽt. kanys gỽassanaeth tir yỽ. Yspeit
pob braỽdỽr yỽ y rodi barn rỽng dadleuwyr o+
ny|s|gỽybyd. pymthec niwarnaỽt. kany dyly
gossot oet dadleu yn ỻei yspeit no hynny. Os
braỽdỽr sỽydaỽc vyd. yna barnet y dadyl a
oed ar oet. neu|dalet y sỽyd y|r brenhin. heb
amgen goỻet. kany dyly neb gynnal sỽyd yn
hỽy noc y gaỻo gỽneuthur gỽassanaeth yn|y
hamser OS braỽdwyr o vreint tir a|archant
yspeit am vraỽt. ae betruster. ae o eissei* rei o
wyr y ỻys. y rei kyndrychaỽl a gaffant oet heb
dỽng. a|r|brenhin a|dyly kymeỻ y rei absen
o wys trỽy vechniaeth neu auel. paỽb o·hon+
unt y|r eil ỻys. a phỽy|bynnac o·honunt yn|yr
oet kymeredic hỽnnỽ a|dremycko y kyfryỽ wys
| « p 92 | p 94 » |