LlGC Llsgr. 3035 (Mostyn 116) – tudalen 172r
Brut y Tywysogion
172r
a|r castel ac yn dywyssogẏon yn|y blaen Meibon gerald ysti+
wart a gỽilim ap aed a|phan welas Meredud ap gruffud y
gỽyr y gorchymynyssic* vdunt gadỽryaeth y casteỻ a|e am+
diffyn y elynyon yn dyuot mor deissyuyt gyru kaỻon yn|y
gỽyr a oruc a|e hanoc y ymlad a|bot yn drech gantaỽ y vryt
no|e oet. Kanẏs kyn bei bychan y|oet eissoes yd oed gantaỽ
weithret marchaỽc ac yn angrynedic dywyssaỽc yn annoc
y|wyr y ymlad ac yn cyrchu e|hun y|elynyon ac arueu. a
phan welas y elynyon bychanet oed y|nifer yn amdiffyn o
vyỽn y casteỻ drychafel yscolyon ỽrth y|muroed a|wnaethant
ac ynteu a odefaỽd y elynyon y eskynu tu a|r|bylcheu ac yn
dilesc ef a|e wyr. a ymhoelassant yr yscolyon yny syrthaỽd
y gelynyon yn|y claỽd gan yrru ffo ar y rei ereiỻ ac adaỽ ỻiaỽs
onadunt yn veirỽ a|r hyn a dangosses idaỽ y detwyd dyg+
hetuen rac ỻaỽ a|r gaffel o·honaỽ daỽn ar wledychu yn|y
deheu. kanys goruu ac ef yn vab. ar lawer o|wẏr prouedic
yn ymladeu ac ynteu ac ychydic nerth y·gyt ac ef. Yn diwed
y|vlỽẏdẏn hono y bu varỽ run ap ywein yn was jeuanc clot+
uorussaf o|e genedyl y|brytanyeit yr hỽn a vagyssei bonhed
y|ryeni yn arderchaỽc. kanys tec oed o|furyf a drych a hynaỽs
o ymadrodyon a huaỽdyr ỽrth baỽb rac·welaỽdyr yn rodyon
vfyd ym|plith y|dylỽyth balch ym|plith ystronyon a|therwyn
garỽ ỽrth y|elynyon digryff ỽrth y|gyfeiỻon. hir y|dyat gỽyn
y|liỽ pengrych melyn y|waỻt. hir y ỽyneb. goleisson y lygeit
ỻydanyon a|ỻawenyon. Mynỽgyl hir praff. dỽyfron lydan.
hystlys hir. Mordỽydyd prafyon. eskeireu hiryon ac od·uch y
draet yn veinon. traet hiryon a bysed vnyaỽn idaỽ. a phan
doeth whedyl. y irat agheu ef at y|dat ywein. ef a godet ac
| « p 171v | p 172v » |