LlGC Llsgr. Peniarth 11 – tudalen 174v

morynyon y gadeir a|doethant yno. ac a adnabuant baredur

ar y daryan yd oed yn y dỽyn. a|r bennaf a dywaỽt ỽrthaỽ. grassaỽ

duỽ ỽrthyt yr drycket vo gan baỽp. Ac yna y kymerth hi efo

erbyn y laỽ. ac a|e duc y|r pebyỻ. Ac yna y|doeth dỽy vorynyon y

dynnu y arueu y amdanaỽ. ac a|dugassant idaỽ diỻat o|e gỽisgaỽ.

A gỽedy hynny ỽynt a|e dugassant att yr arglỽydes. yr honn a

oed etto yn ymdoluryaỽ. Arglỽydes heb y morynyon y gadeir

weldy yma y|marchaỽc yr hỽnn y dyrchafỽyt y pebyỻ hỽnn o|e

achaỽs. ac y gỽnaethost ditheu gỽbỽl o|r ỻewenyd a|wnaethost

yr hynny hyt hediỽ. Ae mab y wreic wedỽ ỽyt ti heb hi. Je heb ef.

Arglỽyd heb hi ti a|ledeist yr aỽrhonn y goreu o|m hoỻ genedyl i

ac a yttoed y|m kynnal yn erbyn vy hoỻ genedyl. Arglỽydes heb+

y morynyon y gadeir gỽeỻ y digaỽn hỽnn dy gynnal di no gỽr

o|r byt. kanys cadarnaf yỽ ef. o|r hoỻ vyt. 

B renhines y pebyỻ yna a gymerth paredur erbyn y laỽ

ac a|erchis idaỽ eisted yn|y hymyl. yna hi a|dywaỽt ỽrthaỽ.

Arglỽyd heb hi pa antur|bynnac vo. vyng|caỻon i yssyd yn gadel

ym wneuthur ỻewenyd ytt. Duỽ a|dalo ytt. heb·y paredur. caos

goch arglỽydes a|vynnassei vy ỻad i yn|y gasteỻ. a minneu a ym+

amdiffynneis yn oreu ac y geỻeis racdaỽ. Yna y vrenhines a|e+

drychaỽd yn|y wyneb ef ac a ennynnawd o|e|garyat. yn gymeint

ac y dywaỽt ỽrthaỽ. Os efo a|rodei y garyat idi. hitheu a uade+

uei idaỽ ef angheu caos goch. Arglỽydes heb ef dy garyat ti

a vynnaf|i y haedu. a|r meu inneu a|gey ditheu. Pa|delỽ yr ad+

nabydaf|inneu hynny heb hi. Arglỽydes heb ef mi a|e dywedaf

ytt. Nyt oes yn y byt varchaỽc urdaỽl oc a|vei yn ryuelu ar+

nat.