LlGC Llsgr. Peniarth 11 – tudalen 59r
Ystoriau Saint Greal
59r
marchogaeth a|wnaeth* yny doethant y|r mynyd yn|y|ỻe
y bu reit udunt disgynnu ac yno ffrỽynglymu eu me+
irch a|orugant. A cherdet y gevynfford a|orugant ỽynteu
yny doethant hyt yn|ty y meudỽy yr hỽnn a|elwit naciens.
a|gỽybydỽch chỽi mae tlaỽt iaỽn oed y gudugyl ef. a by+
chan oed y gapel. ac y|myỽn gard y gỽelynt gỽr prud yn
kynnuỻaỽ banadyl* o|e bỽyta. megys y neb ny bỽytayssei
amgen vỽyt yr ys|talym. ac yr aỽr y gweles ef ỽyntỽy ef a
uedylyaỽd mae marchogyon anturyus oedynt oblegyt y
greal a|e bererindaỽt. ac yna ef a|doeth yn eu herbyn ac a|e
grassawaỽd. ac ỽynteu yn vuyd a gyfarchassant weỻ idaỽ
ynteu. Yna ef a ovynnaỽd udunt ỽy pa antur a|e dugassei
ỽynt yno. Arglỽyd heb·y gỽalchmei chwant oed arnam
gael ymdidan a|thi. ac y geissyaỽ kynghor y gennyt am
y pedruster yssyd arnam. A|phan|gigleu ef walchmei yn|dyỽ+
edut ueỻy ef a vedylyaỽd eu|bot yn wyr kymen ar beth by+
daỽl. Ac yna ef a|dywaỽt. arglỽydi heb ef ny ˄phaỻaf|i y chỽi o
dim o|r a vetrỽyf|i y tu a|chynghor. ac yna ef a|e kymerth ỽy
ygyt ac ef ac a|doethant y|r capel. ac a|ovynnaỽd udunt pa rei
oedynt. ac ỽynteu a|dywedassant eu henỽeu ual yr adnabu
ef bob vn onadunt. ac yna ef a|ovynnaỽd udunt pa gyng+
hor yd|oedynt yn|y geissyaỽ. Arglỽyd heb·y gỽalchmei mi
a|e|dywedaf ytt. Ac yna y|dywaỽt ef y gyfrangk a|e vreudỽ+
yt ual y clywssaỽch o|r|blaen. a|gỽedy hynny ector a|dywa+
ỽt y vreudỽyt ynteu. ac a adologassant* y|r gỽr da dyỽ+
edut udunt beth a|arỽydockaei hynny ~ ~ ~
| « p 58v | p 59v » |