LlGC Llsgr. Peniarth 32 (Y Llyfr Teg) – tudalen 249
Ystoria Adda
249
teruyneu y wyr wlat y ofỽy y temyl o achaỽs
anrydedu y pren bendigedic. ac y damweinỽys
dyd·gỽeith dyuot gỽreic maximiỻa y henỽ. Ac
eisted a oruc ar y pren. Ac ygyt ac yd eistedaỽd
yd enynnỽys y diỻat ac y|ỻoscassant. Ac y do+
des hitheu lef ac y dywaỽt. vyn duỽ|i a|m arglỽyd
i yỽ iessu grist. y kymersant yr idewon hynny
yn waratwyd. Ac y tynnassant y wreic y maes
o|r tref a|e ỻebydyaỽ a mein. A honno uu y wreic
kyntaf a uerthyrỽyt yr yr arglỽyd. Gỽedy hynny
y kymersant ỽy y pren bendigeit ac y tynnassant
y maes o|r dinas. Ac y dodassant y|myỽn dỽfyr
a elwit probatica piscina. Sef yỽ hỽnnỽ ỻynn
prouedigaeth. Eissoes ny mynnei duỽ na bei ogo+
nedus y pren bendigeit. Dỽy·weith beunyd y dein*
agel o nef y|r llyn. ac y kyffroi y dỽfyr A phỽy
bynhac kyntaf a|elei yn|y dỽfyr gỽedy y kyffro
hỽnnỽ o pop kyfryỽ gleuyt oc a|uei arnaỽ; iechyt
a gaffai. Ac ygyt ac y|gỽybu yr idewon y gỽyr+
theu hyn; y kymersant y pren bendigeit y maes
o|r ỻyn. Ac y|dodyssant yn pont vn pren ar dyfỽr
ỻe y|gnotteynt ỻawer o dynyon bodi. Ac yn yr|ynni
hỽnnỽ a|vydynt nodet yredunt a|r perigleu. Ac yno
y gorwedaỽd y pren hỽnnỽ hir o amser hyny
doeth sibli y vrenhines gaỻ y garussalem y pro+
ui doethineb selyf. A phan doeth hi ỻe yd oed y pren
| « p 248 | p 250 » |