LlGC Llsgr. Peniarth 33 – tudalen 16
Llyfr Blegywryd
16
vei. Distein a geiff kymeint a|deuỽr o
aryaneu y|gỽastrodyon Ac ef o|gẏfreiff*
a|geiff mediant ẏnn|y gegin a|r vedgell
Ac ef bieu gossot bỽẏt y|r brenhin
a|seic vch ẏ|laỽ. ac arall is ẏ|laỽ. Yn|y
teir gỽẏl arbennic. a|heilaỽ ar bren+
hin. ac ar|y dỽy seic. Distein a geiff
mantell ẏ|penteulu ympob vn o|r teir
gỽẏl arbennic. Ac ef a|geiff kẏhẏt a|e
vẏs perued o|r cỽrỽ ar|ẏ guadaỽt. Ac
o|r bragaỽt hyt y|kygỽg perued ẏ|r vn
bẏs Ac o|r med hẏt y|kẏgỽg eithaf.
Y nneb a wnnel y cam ẏg|kynted ẏ|neu+
ad; os distein a|e deila. traẏan ẏ|dirỽẏ
neu ẏ|camlỽrỽ a|geiff. Ac vellẏ heuẏt
os is gẏnted ẏ|neuad ẏ|deila. O|r ẏm+
lad deu o|r sỽẏdogẏon ẏnn|ẏ llẏs; ẏ
distein a|geiff traẏan eu dirỽy. Dis+
tein bieu kadỽ traẏan y|brenhin o|r anre+
ith. a|phan ẏ|defnẏdẏo ef a|geiff buỽch
neu ẏch. Distein bieu tygu dros y
brenhin pan vo reit. Rann deuỽr a|geiff
o|grỽẏn ẏ|gỽarthec. a|r ychen. ỻather
ẏnn|ẏ gegin. Rann gỽr med ereiỻ ef
bieu dangos y|baỽp y|eistedua priaỽt
| « p 15 | p 17 » |