Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 51r
Ystoria Lucidar
51r
vn vnolder ynt a duỽ megys y|reigbod vdunt
y vrodyev ef ym|pob peth. Ac vrth hynny. llaỽen
yỽ gantunt. eu gỽelet ỽy velle. Ym pa vffernn
yd yoed* y|rei gỽiryon kynn dyuot krist. Yn|yr
vchaf yn lle kyuagos yr issaf mal y|gallei pob
rei gỽelet y|gilyd. A|rei a|oeddynt |
yno kanny bei boen arnunt. ef a|welit vdunt
ev bot yn|y vffernn o achos vdunt ev bot yn wa+
hannedic y vrth y deyrnnas. Ac ef a|welit y|rei
a|oeddynt yn|yr issaf ev bot wynt ym paradỽys.
Ac odyna yd erchis y|kyfuoethaỽc y lazar bỽ+
rỽ dafnyn o|r dỽfuyr arnnaỽ. Pa ryỽ boen a oed
arnunt ỽy yno. Tywyllỽch e|hun megys y|dy+
ỽedir. Goleuni a|dynn y|rei a|oedynt yn kyfuan+
heddv teyrnnas kyscaỽt aghev. Ac ereill y|my+
ỽn poennyev. vrth hynny y doeth duỽ pann anet
y vchaf vffernn y|rydhav y|rei yd oed gythre+
ul yn|y llethu. Odyna pann vu varỽ yd dysgyn+
naỽd y|vffernn issaf y|brynv y keith y|gann y
gelyn kreulaỽn. Megys y|dyỽedir. Arch di y|rei
yssyd yg|karchar vynet ymeith. Ac y|rei yssyd
yn|y tyỽyllỽch. yn dangos y mae ef. y|vot ynn
galỽ y|rei a|oed yn|y poennyeu yn garcharory+
on. Ac yn dyỽedut bot y lleill yn tyỽyllỽch.
A brenhin y gogonnyant a|e gollyngaỽd. Ac
| « p 50v | p 51v » |