Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 8r
Ystoria Lucidar
8r
hynny o|eirev. nac ef. namyn drỽy y|geireu
hynny y|dangossir y goruchel natur ỽy. ynny
am ev galỽ yn oleuni. Pa natur yỽ vn yr eg+
ylyonn. Tan ysbrydaỽl megys y|dyỽedir.
Ef a|ỽnaeth yr egylyonn o fflam dan. A oes
enỽeu y vihagel. a|gabriel. a|raphael. ys mỽy
y|maent lyssenỽeu. kanys o|damỽein y|gelỽis
dynyon ỽynt velly. Ac nyt oes briaỽt yr
enỽev hynny arnunt yn|y nef. Ar angel
kyntaf o damein. a|elỽit sathan. Sef yỽ hyn+
ny. gỽrthỽynebỽr y|duỽ. Dyỽet ym pa|beth
y|bu ỽrthỽynebỽr ef y|duỽ. pann welas ef y
vot yn ragori rac yr holl raddev yr egylyon
o o·gonyant. a|thegỽch gann tremygu paỽb.
ef a|arvaethaỽd ymogyuuchaỽ a|duỽ. neu
vot yn vỽy noc ef. Pa delỽ. yn ogyuuch. nev
yn vỽy. Ef a|vynnassei gymryt ansaỽd a|vei
well noc a|rodassei duỽ idaỽ. o|e gyfurannv ac
ereill drỽy greulonder o anvod duỽ. a bot yn
arglỽyd arnunt. Beth wedy hynny. O ba|le
is llys nef. ef a|gỽympỽyt a|e vỽrỽ yr|karch+
ar issaf. a|megys yd oed deckaf ef gynt. Velly
y|gỽnaethpỽyt yn du ỽedy hynny. A megys
yd oed loyỽhaf gynt. y|bu dyỽyllaf wedy
hynny. A megys yd oed volyannvs ef gynt
| « p 7v | p 8v » |