Rhydychen, Llsgr. Coleg yr Iesu 57 – tudalen 63
Llyfr Blegywryd
63
tyngu e|hun ar ved y kynnogyn. Ac yna y teir
ach nessaf y|r|talaỽdyr a|dalant y dylyet o·nyt
enwis y kynnogyn gymun dros y dylyet. Kyt
dycko mach y uechniaeth yn|erbyn ỻud arglỽyd.
ny chyỻ yr hynny na|dirỽy na chamlỽrỽ. o gyf+
reith. Ny dyly neb rodi aỻtut yn uach. a*|r neb
a vo kadarnach noc ef. na mynach heb gen+
nat y abat. na|gỽreic o·nyt arglỽydes y|talaỽ+
dyr vyd. nac yscolheic heb gennat y athro. na
mab heb gennat y dat tra dylyo bot drostaỽ.
kyt el y rei hynny yn veicheu. ny dylyir kym+
eỻ mechni neb ohonunt. Tri ỻe yd|ymdiuei+
cha mach kyfadef. am|dylyet angkyfadef. vn yỽ.
o wadu o|r talaỽdyr y mach. Eil yỽ o gaffel tys+
tolyaeth o vn o|r kynnygyn ar y gilyd y ymha+
ỽl yn ỻys. Trydyd yỽ. o lyssu o un tyston y gi+
lyd myỽn y ỻys. Tri pheth ny henynt o uech+
ni. angeu. a|chleuyt. a charchar. Tri ryỽ dirỽy
yssyd. vn o ymlad. araỻ o treis. y tryded o let+
rat. Deu·dyblic vyd dirỽy yn ỻys. ac yn ỻann.
| « p 62 | p 64 » |