LlGC Llsgr. Llanstephan 27 (Llyfr Coch Talgarth) – tudalen 116r

pa daruu ytt. Pan|warchaeassaỽch chỽi vi heb·y Joseph duỽ gỽe+

ner y croclith ar osper. ac am|hanner nos duỽ sadỽrn ual yr

oedỽn o|m sefyỻ yn gỽediaỽ y dyrchafaỽd pedwar angel y ty

yr oedỽn yndaỽ. ac ar|hynny nachaf Jessu echtywynnedigrỽ+

yd goleu. ac rac ovyn y dygỽydeis i ar y daear. ac erbyn vy

ỻaỽ y|m|dyrchafel y vyny. ac ual chỽys a|doeth ym. a tharnu

vy wyneb a|oruc iessu. a mynet dwylaỽ mynỽgyl ym. a|dywedut

ỽrthyf. Joseph heb ef na vit ovyn arnat. edrych panyỽ my+

ui yssyd yma. ac yd edrycheis inneu. Ac y dywedeis ỽrthaỽ

athro ae elias ỽyt ti. Nac elias ỽyf|i heb ef namyn Jessu ỽ+

yf yr hỽnn a gledeist ti y gorff. ac y dywedeis inneu ỽrthaỽ ef.

Pa|delỽ y cledeis i dydi. dangos ym y vynnwent yn|y|ỻe y dodeis

i dydi. ac y kymerth ynteu vy ỻaỽ i ac y|m|duc y|r|ỻe y cladys+

sỽn i efo. ac y dangosses ym yr amdo a|r wisc a rodassỽn i

ymdanaỽ ef. Yna yd adnabuum i panyỽ Jessu oed ef. ac

yna yd adoleis idaỽ. ac y|dywedeis. bendigedic vo y neb a|do+

eth yn enỽ yr arglỽyd. ac y kymerth ynteu vy ỻaỽ i ac y|m|duc

y arimathia y|m|ty vy hun. ac yna y dywaỽt ỽrthyf. Tangne+

ued ytt hyt ym·penn y deugeinuet dyd. ac na|dos o|th ty

aỻan. a|minneu a|af att vyn|disgyblon. Pan gigleu tywys+

sogyon yr offeireit oỻ hynny. a|r|diagonyeit. a|phaỽp o|r Jdeỽ  ̷+

on. daruot a|wnaethant. a syrth·yaỽ mal meirỽ. a dygỽydy+

aỽ a|e hwynebeu ỽrth y ỻaỽr. a|dywedut o hyt eu|ỻef. Pa ryỽ

arwyd yỽ hỽnn yn|yr israel. ni a|adnabuam y tat ef a|e vamm.

Sef y|dywaỽt vn yna. leui oed y enỽ. Mi a atwaenỽn o|e ge+

reint ef rei ac ovyn duỽ yn uaỽr arnunt. ac a offrymynt

yn|y temleu offrymeu gan wediaỽ. ac aberthu y duỽ yr