LlGC Llsgr. 3035 (Mostyn 116) – tudalen 104v
Brut y Brenhinoedd
104v
nyt ymgelaỽd hyny rac arthur. Yd erchis ynteu y gadỽr
tywyssaỽc kernyỽ. kymrẏt whechant marchaỽc a their
mil o pedyd y·gyt ac ef a| mynet yn eu herbyn Ac eu ra+
got y| nos honno y| ford y doynt A| gỽedy kaffel o gadỽr
gỽybot y| ford ẏ| doynt y| gelynyon eu kyrchu a oruc ka+
dỽr yn deissyfyt. A gỽedy briỽaỽ eu bydinoed Ac eu hys+
sigaỽ a ỻad ỻawered o·nadunt. kymeỻ y saesson a
oruc ar fo. Ac ỽrth hẏnẏ diruaỽr dristyd a gofal a
gymerth baldỽlf yndaỽ ỽrth na aỻỽys geỻỽg y vraỽt
o r garchae* yd oed yndaỽ. a| medylyaỽ a oruc py wed y
gaỻei gaffel kyfur y ymdidan A| e vraỽt. kanys eff
a| tybygei y| kaffei pop vn o·nadunt eỻ deu rydit a| gỽa+
ret yn hoỻaỽỻ. pei keffynt ymdidan y·gyt. A gỽedy
na chaffei fford araỻ yn| y byt. Eiỻaỽ y| pen a| e varyf
a oruc. A| chymrẏt telyn yn| y laỽ Ac yn rith erestyn
a gỽaryyd; dyfot ym|plith y lu a| r ỻuesteu. A| r clymeu
a ganei ef. a dangossynt y vot yn telynaỽr. Ac o| r di+
wed gỽedy na| thybygei neb y vot ef yn tywyssaỽc
falst mal yd oed nessau a| oruc parth a muroed y gaer
dan ganu y delyn A gỽedy y adnabot o| r gỽyr o vyỽn
y dynu a orugant ỽrth raffeu y|myỽn A gỽedy gỽelet
ohonaỽ y vraỽt. ymgaru a orugant megys na| r ym+
welynt drỽy lawer o yspeit kyn| no hyny Ac val yd
oedynt veỻy yn medylyaỽ ac yn keissaỽ ystryỽ py
wed y geỻynt ymrydhau o·dẏno ac yn anobeithaỽ
o| e rydit. na·chaf eu kenadeu yn dyfot o germani
a| whechant ỻog yn ỻaỽn o varchogyon aruaỽc gan+
tunt. A| chedric yn tywyssaỽc arnadunt Ac yn diskynu
yn yr alban A gỽedy clybot hynny o arthur. ymadaỽ
a| oruc ynteu a| r dinas rac pedruster y ymlad a| r veint
| « p 104r | p 105r » |