LlGC Llsgr. 3035 (Mostyn 116) – tudalen 17r
Ystoria Dared
17r
1
y|baỽb dywedut a|raghei y bod ỽy y hyny a|phaỽb a gy+
2
uunỽẏs ac ef. a gỽneuthur agamemnon yn amher+
3
aỽdyr ac yn benaf arnunt a|thranoeth gỽyr goroec troea
4
yn ỽychyr a gerdyssant y|r vrỽydyr ac agamemnon
5
a|duc y lu ynteu y|maes yn eu herbyn a|phaỽb o|r ỻuoed
6
a ymladassant yn da ac wedy dyuot y|ran vỽyaf o|r
7
dyd. Troilus a gerdaỽd y|r vydin gyntaf ac a ladaỽd y
8
groecwyr ac a diffeithỽys y|maes ohonunt ac a|e ffoes
9
hẏt eu kestyỻ a thradỽy gỽyr troea a|deuthant a|e ỻu
10
y|maes ac yn|y herbyn ỽynteu agamemnon a|dysgỽys
11
y vydin ac aerua varỽr a vu o|pop vn o|r deu·luoed ac
12
a ymladaỽd yn da yn eu kyfeir a|throilus a|ladaỽd
13
ỻawer o|r tywyssogyon goroec ac y·veỻy yd ymladaỽd
14
seith niwarnaỽt duuntu yna agamemnon a|erchis
15
kygreir deu vis a gỽedy ymgadarnhau ohonunt aga+
16
memnon o anrydedus wassanaeth a gladỽys palami+
17
des a|phob rei ohonunt o|pop parth a gladassant eu tywys+
18
ogẏon a|e marchogyon vrdaỽl ereiỻ oỻ yn anrydedus
19
a|hefyt agamemnon a anuones tra vu y gygreir. vlixes
20
a|nestor a diomedes ac achil yn erchi idaỽ vynet y|r
21
vrỽydyr gyt a|hỽy ac achil yn drist am yr|ossot oho+
22
naỽ yn|y vrat nat aei y ymlad yr achaỽs yr adaỽ
23
ohonnaỽ y ecuba vynet y|ỽ wlat neu ynteu yn diheu
24
nat ymladei ỽrth y vot ef yn karu polixena yn dir+
25
uaỽr ef a|dechrewis kablu y kenadeu a|dathoedynt
26
attaỽ ỽrth vot yn weỻ y|dylyynt hỽy geissaỽ tragy+
27
wydaỽl dagnefed yrydunt a gỽyr goroec. ac ymlad
28
yn ỽychlaỽn a|wnaethant a|throilus a vrathỽys
29
diomedes a|dỽyn ruthur a|wnaeth agamemnon
30
heuyt a|e vrathu. ac ef a|ladaỽd ỻawer o|wyr goroec
« p 16v | p 17v » |